-Almmuhus-
SMÁVVAOĐĐASATGohčču heahte­čoahkkimii maŋŋel jápmin­lihkohisvuođaid

Gohčču heahte­čoahkkimii maŋŋel jápmin­lihkohisvuođaid

-

-

Sotnabeaivvi duššaiga guovttis biilalihkohisvuođas Beardus. Dat lei vahkkoloahpa nubbi jápminlihkohisvuohta. Dál doallá geaidnohoavda heahtečoahkkima. 

Sotnabeaivvi, geassemánu 26. beaivvi, dušše guokte olbmo biilalihkohisvuođas Brandvoll geaidnoearus, Beardu suohkanis.

Oktiibuot ledje vihtta olbmo dan golmma biillas mat gárte lihkohisvuhtii. Guovttis sáddejuvvuiga Davvi-Norgga universitehtabuohccevissui ja goalmmát olmmoš ges dolvojuvvui dearvvašvuođaguovddážii. Sii eai leat nu garrasit roasmmehuvvan ahte livččii heaggavárra. 

Oapmahaččat leat ožžon dieđu jápminlihkohisvuođa birra ja Romssa politiijaguovllus leat dutkagoahtán lihkohisvuođa. 

Nubbi jápminlihkohisvuohta

Ievttá lihkohisvuohta lei vahkkoloahpa nubbi jápminlihkohisvuohta. Sotnabeaivvi čuovganeapmái jámiiga guokte 19-jahkásačča mohtorsihkkellihkohisvuođas Rages, Gjesdalas. 

Dássážii leat geassemánus duššan 14 olbmo Norgga johtolagas, mii lea beali eanet go diibmá seamma mánus. 

 – Mun lean vuorjašuvvan lihkohisvuođaid geažil. Dat eai leat dušše logut ja statistihkat. Dás lea sáhka olbmuid heakkas, bearrašiid ja servodagaid birra mat báhcet lossa morrašii, lohká Norgga geaidnodirektevra Ingrid Dahl Hovland preassadieđáhusas. 

Heahtečoahkkin

Norgga johtolagas ledje unnán jápminlihkohisvuođat álggogeahčen jagi, muhto giđđat ja giđđagease lassánedje jápminlihkohisvuođat sakka. Dássážii leat golmma gearddi eanet olbmot jápmán johtolagas go diibmá seamma áigodagas. 

Dál dáhttu geaidnodirektevra eastadit jápminlihkohisvuođaid. Vuossárgga gohčču son heahtečoahkkimii.

– Mii fertet bissehit dán heajos ovdáneami. Geasset lávejit Norggas eanet lihkohisvuođat go muđuid jagis. Dalle johtet eanet olbmot ja oallugat vudjet menddo jođánit. Dat dagaha ahte lea lihkohisvuođavárra lea stuorát. Lea dehálaš ahte olbmot maid váldet ovddasvástádusa, geavahit biilaboahkána, muddejit leahtu ja eai vuoje biillain gárrenoaivvis. Dalle sáhttit ovttas eastadit duođalaš lihkohisvuođaid, dadjá Hovland. 

Dássážii leat Norgga johtolagas duššan 60 olbmo. Diibmá dušše 31 olbmo álgojahkebealis. 

-Almmuhus-