Fylkkagielda lea gohččon Kárášjoga gieldda buktit rehketdoalu Snowboardpárka-prošeavtta ovddas, jus dan eai daga de gielda gártá máhcahit 118 duhát ruvdnosaš doarjaga.
Fylkkagielda lea gohččon Kárášjoga gieldda buktit rehketdoalu Snowboardpárka-prošeavtta ovddas, jus dan eai daga de gielda gártá máhcahit 118 duhát ruvdnosaš doarjaga.
2012:s juolluduvvui 118 00 ruvnnu spillenruđain Kárášjoga gieldda snowboardpárkaprošektii, mii galggai ásahuvvot Kárášjoga alpinluohkkái.
Galge gárvet guovtti jagis
Spillenruđaidnjuolggadusaid mielde galget dákkár rusttegat maidda leat juolluduvvon spillenruđat gárvejuvvot guovtti jagis das rájes go ruhta juolluduvvo. Dan maŋŋil galgá gielda dárkkistit ahte rusttegat leat válmmastuvvon ovdalgihtii dohkkehuvvon plánaid mielde ja addit rehketdoalu revisorii, čállá Finnmárkku Fylkkagielda reivves Kárášjoga gildii
Kárášjogas eai leat dán dahkan ja nu gohččot gieldda sáddet válmmasvuođaduođaštusa, rehketdoalu ja gielddarevišuvnna cealkámuša fylkkagildii. Dát galgá dahkkon geassemánu 30. beaivvi rádjat muđuid gielda šaddá máhcahit ruhtadoarjaga fylkkagildii.
Ii dovdda ášši
Kárášjoga gieldda teknihkalaš hoavda, Trygve Nilsen, ii loga iežas dovdat ášši.
– Diet ášši ii leat meannuduvvon vuos, ja diet ii leat leamaš áššelisttuin goit dan áiggis go mun lean doaibman, dadjá Nilsen.
Ii ráđđeolmmái Elfrid Boine ge loga iežas dovdat ášši.
– Mun lean olgoriikkas mátkis, iige leat vejolašvuohta iskagoahtit dien, dadjá son.
Ávvir ii leat fáhten sátnejođiheaddji Anne Torill E. Balto ságaide dán áššis.
