-Almmuhus-
OĐĐASATGodde vihtta ja lábmejedje 30

Godde vihtta ja lábmejedje 30

-

-

Beatnagat fallehedje bohccuid:

Guhkesbearjadaga fallehedje guokte beatnaga čorraga Anáris, Suoma bealde. Beatnagat godde vihtta bohcco, dasa lassin leat vel 30 lápmahuvvan. 

Paliskuntain yhdistys, mii lea Suoma boazodoalloberošteddjiid orgána, bijai guhkesbearjadaga govaid iežaset Facebook-siidui ja čálle ahte ekonomalaš váikkuhusat leat stuorrát go nu ollu bohccot lápmahuvve ja jápme go beatnagat oaguhedje daid.  

Paliskuntain yhdistys direktevra Anne Ollila ii hálit muitalit nu ollu dáhpáhusa birra go politiijat leat dutkame ášši, muhto duođašta ahte dáhpáhus dáhpáhuvai Anára guovllus ja ahte vihtta bohcco gottáhalle ja 30 lápmahuvve.

– Lihkus oaččuimet gitta beatnagiid, go áidde siste ledje eambbo vel bohccot, ja jus eat lean fáhtet beatnagiid, de gal lei sáhttit mannat vel heajubut, dadjá Ollila. 

Máŋga duháha euro

Ollila árvvoštallá ahte ekonomalaš vahát šaddá hirbmat stuorisin boazodoallái, go ii han das leat sáhka dušše dan viđa bohccos mat gottáhalle, muhto máŋgalogi han vel lápmahuvve. 

– Dán áššis lea vahát máŋga duháha euro ovddas. Dás šaddá maid geahččat lassibarggu ja šibitdoaktárii ja dálkasiidda goluid, dadjá Ollila, ii ge hálit muitalit guđe bálgosii bohccot gulle, muhto duođašta gal ahte eai lean turistafitnodaga hearggit. 

– Eai lean, gulle dábálaš ellui, dadjá Ollila, ii ge loga sáhttit dadjat dađi eambbo ášši birra politiijaid barggu geažil. 

Lappi politiijat eai ge hálit dadjat maidege ášši birra, eará go ahte duođaštit ahte sii leat ožžon váidaga ja ahte dihtet gii eaiggáduššá beatnagiid. 

– Measta jahkásaččat

Suoma Sámedikki ságajođiheaddji Tuomas Aslak Juuso ii loga iežas dovdat dáhpáhusa eará go mediaid bokte, ja danne ii sáhte kommenteret dan ovttaskas dáhpáhusa nu vuđolaččat. Son dattetge muitala ahte dakkár dáhpáhusat leat measta jahkásaččat Suoma bealde.

– Measta jahkásaččat mii gullat ahte beatnagat gaikkodit bohccuid, muhto eai láve gal jur nie stuora logut go dán háve ledje. Lea leamaš guhkit áiggi váttisvuohta dáppe Suoma beale Sámis ge ahte beatnagat gaikkodit bohccuid, dadjá Juuso, ja oaivvilda ahte lea stuora vahágin boazodollui go dakkár dáhpáhusat dáhpáhuvvet. 

– Lea hui váidalahtti go olbmuid beatnagat dahket diekkár daguid ja go diekkár dáhpáhusat oba dáhpáhuvvet ge, dadjá son. 

– Beanaeaiggáda ovddasvástádus

Juuso muitala ahte vaikko jahkásaččat dáhpáhuvvet dakkár dáhpáhusat, de ii leat Sámedikkis vejolaš váikkuhit njuolggadusaide njuolga, muhto bargat guovddáš eiseválddiid guvlui. 

– Eahpenjuolga gal dieđusge sáhttit gulahallat guovddáš eiseválddiiguin beananjuolggadusaid birra. Mis lea Sámedikkis guhkit áiggi leamaš sávaldat ahte beanavuodjin maid nogašii sámi ruovttuguovlluin. Beanavuodjin maid dagaha váttisvuođaid boazodollui. Muhtumin dat baldet ealuid ja sáhttá vel nu guhkás ge mannat muhtumin ahte beatnagat gaikkodit bohccuid, dadjá Juuso. 

-Almmuhus-