Rievssatlohku lea lassánan Finnmárkkus ovddit bivdoáigodaga rájes.
Rievssatlohku lea lassánan Finnmárkkus ovddit bivdoáigodaga rájes.
– Rievssatlogu lassáneapmi vássán bivdoáiggis lea illudahtti ja dát leat buorit ođđasat, lohká smávvafuođđobargi FeFos, Even Borthen Nilsen.
2014/2015:s vuvde 5591 bivdokoarta smávvafuođđobivdiide. 2531 bivdiin eai lean gullevaččat Finnmárkui. Leat 300 eambbo koartta go ovddit áigodagas.
Eanemusat bivde rievssahiid, muhto leat maid bivdán vuovdelottiid Mátta-Várjjagis ja njoammiliid Oarje-Finnmárkku sulluin. Dieđut maid FeFo lea ožžon sisa, čájeha ahte leat báhčán birrasiid 16 300 rievssaha ja 6 800 girona. Ovddit bivdoáiggis godde oktiibuot 17 400 rievssaha.
Sáhpánjahki maid váikkuha
Vaikko lea buorre geassi ja sáhpánjahki, de ii leat sihkkar ahte rievssatlohku lassána dan dihte. Rievssat- ja vuovdeloddelohkui sáhttá maid váikkuhit funet jus lea unnán borramuš, ollu borrit ja dálkerievdadeamit.
FeFos eai dieđe vel movt dán čavčča elliidlohku šaddá ovdal go leat geahččan árvomeroštallama čakčamánu 1.beaivvi. Ovddit čavčča meroštallan čájehii ahte lei vuollel gaskamuddosaš lohku. Lea čielga čanastat rievssat- ja sáhpánlogus.
Vejolaš bivdit riebana
Suoidnemánu 15.b. rájes álgá ođđa bivdoáigi ja lea vejolaš bivdit riebana. Fuođđokoarttaid leat oastin ládje jo suoidnemánu 1.beaivvi rájes. Smávvafuođđokoarttat leat oastimis borgemánu 1.beaivvi rájes.
– Lea gelddolaš áigi dál. Orro čájeheame ahte rievssat ja vuovdelotti bessenlohku lea lassánan máŋgga sajis Finnmárkkus. Jus bures manná lállimiin, ja sáhpánlohku bissu badjin geasis, de sáhttá rievssatlohku lassánit bures, loahpaha Borthen Nilsen.
