2018:s galget badjel 300 Norgga nissona oažžut dan dieđu ahte sis lea goaŧŧečeabehis borasdávda. Boahtteáiggis galgá dat lohku nohkat.
Dál lea njealját jahki go #iskkaiežat-kampánja lágiduvvo, man mihttu lea oažžut eambbo badjel 25-jahkásaš nissoniid iskkahit lea go goaŧŧečeabehis borasdávda – eastadan dihte borasdávdda.
– Lihkus mannat rievttes guvlui. #Iskkaiežat-kampánja geažil leat dál 72 000 eambbo nissona geat jahkásaččat iskkahit lea go sis goaŧŧečeabehis borasdávda, ja oallugat leat eastadan borasdávdda. Mii geahččali šaddat vuosttaš riikan máilmmis gos ii leat goaŧŧečeabetborasdávda. Goaŧŧečeabetborasdávda galgá jávkat, dadjá Kreftforeningen váldočálli, Anne Lise Ryel preassadieđáhusas.
Son oaivvilda ahte lea áibbas realisttalaš boahtteáiggis ahte oktage ovdánahte goaŧŧečeabetborasdávdda Norggas.
Jus nissonat riŋgejit iežaset fástadoaktárii ja váldet iskkadeami go #iskkaiežat-reive boahtá Borasdávdaregisteris, unnu borasdávdda riska 80 proseanttain.
