Girkonjárggas ja olles Norggas lea lassánan beroštupmi goargŋumii. Lágideaddji ii loga dušše deahkkegivrodaga dárbbašit go goargŋu, muhto ferte maiddái sáhttit plánet ja jurddašit sihkarvuođa go goargŋu.
Lávvardaga lágiduvvui vuosttaš vuorru FINKLA 2017 goargŋuncupas Girkonjárggas. Goargŋunberošteaddjit miehtá Finnmárkku ledje čoahkkanan Girkonjárgii gilvvohallat goargŋumis.
FINKLA 2017 Girkonjárgga cupa vuoru lágideaddji Sonja Jørgensen muitala sis soite leamaš menddo álkes goargŋunruvttot ja cupa manai njuovžilit.
– Lea mannan hui bures, buot lea mannan njuovžilit ja olbmot orrot návddašan doaluid. Olbmot leat beassan goargŋut hui olu, mis ledje vissa álkes ruvttot go golmmas nagodedje buot čuoggáid maid lei vejolaš oažžut almmáiolbmuid luohkás. Olbmot leat beassan goargŋut olu ja jáhkán sii leat návddašan dan, lohká Girkonjárgga cupa vuoru lágideaddji Sonja Jørgensen.
Álggahedje cupa
Ledje sullii 30:s geat oassálaste goargŋuncupas, logis almmáiolbmo luohkás ja logis nissonolbmo luohkás, ja lei maiddái nuorain nieida- ja gándaluohkká mas nuorat gilvaledje goargŋumis.
– Mii leat lágidan FINKLA 2016 ja dál leat álggahan FINKLA 2017 ja áigut joatkit maŋŋá juovllaid maiddái. Dáinna cupain leat goargŋunsearvvit oahpásmuvvan, go Finnmárkkus ii leat nu stuorra goargŋunbiras, ja dál go mii beassat deaivvadit cupa oktavuođas. Ovdal leat lágiduvvon báikkálaš gilvvut goargŋumis ja FINKLA 2016 cupa lea vuosttaš háve go mii čohkkiimet Finnmárkku goargŋunbirrasa. Olles Norggas lea goargŋunberoštupmi lassáneamen ja maiddái Finnmárkkus, dan mii oaidnit dál buot servviin, dadjá Jørgensen.
Ekstremavalástallan
Goargŋun lea ekstremavalástallan ja sihkarvuohta lea hui dehálaš go goargŋu. Cupa lágiduvvui Girkonjárgga skuvlla valáštallanlanjas gos goargŋunseaidni lea gávcci mehtera allat. Okta goargŋungilvaleaddji lei measta áibbas badjin seainnis go gahčai, ja son gahčai nu guhkás ahte lei dušše moadde sentte láhttis.
Jørgensen lohká lea dehálaš jurddašit sihkarvuođa go goargŋu ja olmmoš ferte leat gozuid alde go dan dahká:
– Goargŋun lea ekstremavaláštallan ja čuovvu riska dán valáštallamis, riska lea ahte sáhttá gahččat ja maiddái roasmmuhuvvat jus beasaha gokko lea doallamin. Mis lei muhtun gii vajálduhtii ovtta darvvihanrieggá mii mielddisbuvttii ahte lei olu báddi mii lei olgun ja son de gahčai guhkás vulos, muhto nu guhká go sihkkarasti lea čuovvumin mielde mii dáhpáhuvvá, de manná dábálaččat bures, čilge Jørgensen.
Son lohká ahte lea ge hui dehálaš ahte ii leat váiban ja lea gozuid alde go goargŋu. Mis lea ovdal leamaš nu ahte gilvaleaddjit ožžot vihtta diimmu goargŋut, ja de mii oaidnit ahte dopmet ja gorgŋot olles áigge, ja de sii sakka váibbas fysalaččat ja psyhkalaččat. Mii leat dál bidjan áiggi goargŋuide čieža diimmu vai astet váldit unna bottožiid ruvttuid gaskka. Mii fertiimet dan dahkat vai sii leat eanet gozuid alde, go mii fertet jurddašit sihkarvuođa dán valáštallamis.
Ii dušše deahkkegivrodat
Son muitala mii lea mii geasuha olbmuid válljet goargŋuma ja maid ferte jurddašit go goargŋu.
– Go goargŋu, de ferte sáhttit plánet gokko ja mo áigu goargŋut. Olbmot jáhkket ahte lea beare sáhka nannemis iežas deahkkegivrodaga vai mánná bures goargŋut, muhto olmmoš ferte nagodit jurddašit mo áigu goargŋut ja seammás ferte smiehttat sihkarvuođas, gosa ain darvvihat rieggá. Lea olu balánsa, fleksibilitehta ja dieđusge ferte leat suorbmagivrodat go goargŋu, muitala FINKLA 2017 Girkonjárgga cupa vuoru lágideaddji, Sonja Jørgensen.
