Moatti beaivvi geahčen almmuha Slincraze iežas ođđa EP skearru, Mirku ep. Iežas mielas lea skearru ollu buoret go dat ovddit skearrut sus.
– Sisdoallu lea hui ollu musihkka birra, movt musihkka lea mu eallima rievdadan, sihke buoris ja bahás, dadjá son Ávvirii dán ođđa skearru birra mii lea boađiboađi.
Mánnodaga almmuha ge Slincraze vihtta áibbas ođđa lávlaga ođđa EP skearrus. Dáinna skearruin lea sámi ráppár Slincraze dahje Nils Rune Utsi bargan ođđajagi rájes, dan rájes go vuolláičáli šiehtadusa Pug Life Management fitnodagain álggus dán jagis.
Buoret go ovddibat
Son lea ovdal almmuhan ovtta olles CD ja vel ovtta EP- skearru. Ieš dadjá Slincraze ahte dát lea olu buoret go dat ovddit skearrut.
– Na vuosttažettiin lea dán háve leamaš buorre áigi bargat dáinna ja ožžon dan de juste nu movt mun ieš háliidin. Muhto maiddái produkšuvdna lea hui buorre. Lean earret eará ožžon ovtta produseantta Amerihkkás veahkkin, nu ahte lea eambbo hip-hop go ovdal lea leamaš, čilge son.
Konsearta beassážiid
Slincraze doallá konseartta maid beassážiid Guovdageainnus mas lávlu lávlagiid mat leat dán ođđa EP-skearrus. Skearrus leat 3 sámegielat ja 2 eŋgelasgielat lávlaga. Dan leaba buvttadan Kjell Rune Myrland ja Harald Austad Supervillain music fitnodagas.