-Almmuhus-
-Almmuhus-
OĐĐASATGLR sáddegoahtá fas radiobingo

GLR sáddegoahtá fas radiobingo

-

-

Guovdageainnu lagasradio (GLR) leamaš beanta jaska guovvamánu rájes, ja radiobingo ii leat lágiduvvon logi vahkkui. Dál lea lagasradio fas ožžon bingolobi ja radiobargi guovttos čákŋaleaba fas studioi.

Duorastaga lea Guovdageainnu lagasradio gearggus fas sáddegoahtit radiobingo mii ii leat gullon ođđajagimánu 22. beaivvi rájes. Dalle massii GLR bingolobi váilevaš rehketdoalu dieđiheami geažil.

 – Dál leat buot lobit ja báhpirat ordnegis. Mis ii leamaš bingo logi vahkkui, nu ahte in dieđe šat máhtán go lágidit bingo. Dál ferten hárjehallagoahtit, lohká GLR bingohoavda ja doaimmaheaddji Poasta-Issát dahje Isak Nils Hætta.

 

Gulahalle moivvi birra

Lotteriijabearráigeahčču gilddii GLR:a sáddemis bingo go eai sádden jahkásaš rehketdoalu sidjiide. GLR váldodoaimmaheaddji lea ovdal čilgen Ávvirii ahte heajos gulahallan dagahii ahte masse bingolobi, dasa lassin lei reive sáddejuvvon boasttu čujuhussii. Easka cuoŋománu 1. beaivvi beasai GLR ođđasit sáddet ohcamuša lágidit bingo.

 – Mii leat humadan ja Lotteriijabearráigeahčču lei nu siivui ahte beasaime sáddet visot báhpiriid ođđasit ovdal njukčamánu 20. beaivvi. Ovdal beassážii oaččuimet ođđa bingolobi, čilge Poasta-Issát.

 

Čákŋaleaba fas studioi

Radiobingos lea nu stuora mearkkašupmi GLR ruhtadillái ahte guovvamánu gaskkamuttus jáddadedje mikrofuvnnaid ja bargoguovttos gárttaiba bággolupmui. Dan rájes lea GLR dušše sádden Inga Juuso muitokonseartta ja Sámi Grand Prix vássán basiid. Odne lea GLR bargiguoktás dábálaš bargobeaivi.

 – Lea ártet fas leat barggus. Mis láve geasset boddu, muhto dáid muttuid ii leamaš radio goassege jaskat dan rájes go álggaheimmet GLR:a 1991:s. Olbmot márkanis leat váillahan sáddagiid ja bingo, rámbuvrras jearahallet goas fas sáddegoahtit. Sin mielas leamaš nu ártet ja guoros go GLR ii gullo, muitala Poasta-Issát.

 

Kárášjogas maid viimmáskan

Guovdageainnu lagasradio sádde FM fierpmádagas Guovdageainnus ja Kárášjogas, dasa lassin gullo GLR interneahtas. Lagasradios leat beaivválaš sáddagat mat gullojit sullii diimmu maŋŋelgaskabeivviid, dasa lassin sáddejuvvo radiobingo juohke duorastaga. Bingospeallit leat maid váillahan GLR:a.

 – Mun fitnen odne iđđes doalvumin bingobongaid Kárášjohkii, ja doppe fuomášeigga guokte áddjá mu. Soai logaiba, de dál gal gullogoahtá fas bingo. Go jo Kárášjogas maid fuomášedje dán, de gal sávan ahte bingospeallit eai leat vajálduhttán ahte mii álggahit fas bingo, dadjá Poasta-Issát.

-Almmuhus-