-Almmuhus-
OĐĐASATGLR redaktevra njuolggo­sáddagis: – Danne go mii leat gárremiin!

GLR redaktevra njuolggo­sáddagis: – Danne go mii leat gárremiin!

-

-

Sotnabeaivve čuovganeapmái lei Guovdageainnu lagasrádios rádiosátta mii ii lean plánejuvvon ovdagihtii. Oasážis sáddagis gulle guldaleaddjit earret eará doaimmaheaddji Nils Martin Kristensena čujuheamen dasa ahte sii leat gárremiin studios. 

Sotnabeaivve čuovganeapmái bijai Guovdageainnu lagasrádio čállosa iežaset Facebook-siidui mas sii ávžžuhit guldalit sin sáddaga. Sii čállet «Njuolggosátta GLR:s dál!», ja guldaleaddjit gulle earret eará go doaimmaheaddji Kristensen digaštallá muhtin earáin studios ja čuoččuha ahte jienas ii leat mihkke boastut, muhto sii leat gárremiin. 

– Mii gullat iežamet danne go leat gárremiin! dadjá Kristensen ja boagusta sáddagis. 

– Heitot dáhpi

GLR lea mielde Norgga preassalihtus ja Norgga lagasrádiolihtus. Norgga lagasrádiolihtu beaivválaš jođiheaddji Pål Lomeland ii loga iežas dovdat dáhpáhusa, muhto dattetge dadjá ahte gárrenoaivvis ii leat dohkálaš sáddet rádiosáddaga. 

II DOHKÁLAŠ: Norgga lagasrádiolihtu beaivválaš jođiheaddji Pål Lomeland ii loga dohkálažžan sáddet rádiosáddaga gárrenoaivvis. Preassagovva: Jacob Buchard
II DOHKÁLAŠ: Norgga lagasrádiolihtu beaivválaš jođiheaddji Pål Lomeland ii loga dohkálažžan sáddet rádiosáddaga gárrenoaivvis. Preassagovva: Jacob Buchard

– Norgga lagasrádiolihttu ii dovdda dán áššis detáljaid ja danne ii hálit dál dadjat maide juste dán ášši birra. Muhto obbalaččat sáhtán dadjat ahte Norgga lagasrádiolihtu miellahtut leat geatnegahtton čuovvut ehtalaš njuolggadusaid ja njuolggadusaid mat leat čállon «Leage várrogas plakáhtas» ja doaimmaheaddjeplakáhtas. Dasa lassin lea doaimmaheaddjis sierra ovddasvástádus mii lea meroštuvvon mediaovddasvástáduslágas. Doaimmahit redakšuvnnalaš doaimmaid gárrenoaivvis ii heive buriid preassavieruide ja lea dahku man mii lihttun dieđusge eat dohkket, dadjá Lomeland Ávvirii. 

Doaimmaheaddjeplakáhtas čuožžu ge ahte doaimmaheaddjis lea persovnnalaš ja dievas ovddasvástádus media sisdoalus.

Ii makkár ge ulbmil

GLR doaimmaheaddji Nils Martin Kristensen muitala Ávvirii ahte sátta ii lean plánejuvvon ovdagihtii ja ahte diekkár dáhpáhusat eai galgga dáhpáhuvvat. Son čilge ahte sii ledje čohkken mielbargiid deaivvadeapmái maŋemus vahkkoloahpa ovdal go sáddagat fas álget mánnodaga. 

GULDAL: GLR Facebook-siiddus almmuhuvvui lávvordateahkeda čálus mii ávžžuha guldaleddjiid guldalit GLR. Šearbmagovva GLR Facebook-siiddus
GULDAL: GLR Facebook-siiddus almmuhuvvui lávvordateahkeda čálus mii ávžžuha guldaleddjiid guldalit GLR. Šearbmagovva GLR Facebook-siiddus

– Mis lei dakkár suohtas deaivvadeapmi dás GLR:s ja dat manai nu go ii livčče galgan ja mii barggaimet dakkár diŋggaid maid eat galggaše. Mis ii lean makkár ge ulbmil sáddagiin, muhto juste dalle lei dušše hui suohtas. Dál maŋit áiggis gal mieđihan ahte lei áibbas endorii, dadjá Kristensen. 

Son dadjá ahte lea šállošahtti ja ahte diekkár dáhpáhusat eai dáhpáhuva boahtteáiggis. 

– Diekkár diŋggaid ii jurdil ovdagihtii ja go de dáhpáhuvvá, de lea dáhpáhuvvan. Mun lean doaimmaheaddji ja mus lea diehttelasat ovddasvástádus buot dáhpáhusaid ovddas. Muhto nu go dadjen, mis lei somá, leimmet čohkken mielbargiid ja nu dat dáhpáhuvai, dadjá son.  

-Almmuhus-