Vaikke Guovdageainnus eanaš sámegielagat hupmet davvisámegiela, de lea lagasradio liikká sáddegoahtán máttasámegillii maiddái.
Vaikke Guovdageainnus eanaš sámegielagat hupmet davvisámegiela, de lea lagasradio liikká sáddegoahtán máttasámegillii maiddái.
Guovdageainnu Lagasradio (GLR) sáddegođii ikte maiddái máttasámegiel radioprográmma. GLR bargi Boasta Issát, Isak Nils Hætta, muitala sis lea juohke mánnodaga diibmobeallásaš sátta radios máttasámegillii.
– Mis lea ovttasbargu Nea radioin, Plassjes mii buvttada sáddaga. Eat leat vel ožžon nu ollu máhcahemiid, muhto sávvamis váldo bures vuostá, lohká Hætta.
Čalmmustahttet giela
Son muitala sii leat siskkáldasat ságastallan doaimmahagas ahte máttasámegiella lea giella man unnán olbmot hupmet ja lea dehálaš čalmmustahttit máttasámegiela.
– Mii sáddet FM-fierpmádaga bokte Guovdageainnus, Kárášjogas ja Deanus, ja diehtit doppe gávdnojit olbmot geat máhttet máttasámegiela. In dieđe leat go mii dáinna mielde seailluheames giela, muhto ii bahás goit daga, ja jus nagodit váikkuhit seailluheapmái, na mii vel buoret, lohká Hætta.
Ožžot nuvttá
Hætta muitala duogáš ovttasbargui lea go soai GLR-redaktevrrain Nils Martin Kristenseniin leaba ollu jagi dovdan Nea radio redaktevrra ja leaba oahppásat redaktevrii.
– Go Nea radio mearridii álgit máttasámegiel sáddagiiguin, de jurddašeimme hás heivešii GLR:i maid sáddegoahtit sin prográmmaid. Nu šattai ja maŋŋel go Nea radio sádde máttasámegiel prográmma juohke duorastaga, de sáddejit midjiide prográmmafiila áibbas nuvttá, ja mii fas sáddet dan mánnodagaid diibmu 17.00, muitala Hætta.
Neahttaradios lassánit
Hætta ii loga diehtit ollu guldaleaddjit sis leat dan golmma suohkanis, mat guldalit radio FM-neahta bokte.
– Dan maid sáhttit oaidnit lea man ollugat guldalit min neahttaradio. Mii oaidnit maid ahte lassánit guldaleaddjit geat válljejit neahta bokte guldalit, muitala son.
