Jiehkkejávri Girona gielddas lea bivnnuhis galledanbáiki turisttaide. Dál lea Girona gielda rievdadan árbevirolaš sámi báikenama.
Girona gielda lea diibmá huksen bisánansaji biillaide E10-luoddagurrii Duortnosjávrri lahka. Jiehkkejávri mas lea sámi namma árbevirolaččat leamas Geađgejávri dehe Riššajávri. Jagis 1989 oaččui jávri ruoŧagiel nama «Trollsjön». Dan oktavuođas lea maid Girona gielda ceggen galbba ja das lea gielda rievdadan árbevirolaš sámi báikenama ja leat jorgalan «Trollsjön» Ruollajávrin.
Riššajávri lea Gabná čearus ja Nils Anders Kuhmunen moaitá dál Girona gieldda.
– Ii dat dovdu riekta. Jávri ii leat goassege leamas Ruollajávri, dadjá son SVT Sápmái.
Riššajávri
Girona gieldda ovddeš gielddasátnejođiheaddji Gunnar Selberg dadjá ahte ii gáđa mearrádusa vaikko jávri lea ožžon boasttu nama.
– Gielddas lea ovddasvástádus ja lea árvu doalahit historjjálaš ja árbevirolaš báikenamaid. Muhto lea ruoŧagillii «Trollsjön» ja mu mielas lea vuogas geavahit dan nama maid olbmot dovdet min jávrriin, várin ja eanuin dadjá son SVT Sápmái.
Sámegielat professor Mikael Svonni, dadjá ahte lea dábálaš ahte sámi báikenamat rievdaduvvojit.
– Báikenamain lea fápmu ja historjá dadjá son TV prográmmas «15 minuter från Sápmi» mas lea báikenamaid birra ja gávdno SVT Playas.
