Sis-Finnmárkku proavás dieđihii ahte girkui eai sáhte boahtit eambbo go 50 olbmo.
Ollu báikkiin Norggas lea koronanjoammun laskan hirbmosit ja ráđđehus lea čavgen njoammuneastadannjuolggadusaid miehtá riikka.
– Dat mii guoská girkuide, de leat mii fas seamma dilis go mannan geasi. Mii eat sáhte leat eambbo go 50 olbmo girkus. Lea juo váikkuhan konfirmašuvnnaide min guovllus. Čuohcá maiddái gásttašemiide ja vihahemiide, lohká Sis-Finnmárkku proavás Egil Lønmo preassadieđáhusas.
Hávdádemiide čuohcá eanemus
Eanemus váikkuhusat šaddet hávdádemiide.
– Dávjá lávejit hávdádemiin máŋgačuođi olbmo mieđušteame bearašolbmo, fuolkki, verdde dahje ránnjá. Mii han háliidat čájehit ahte dat olmmoš mearkkašii juoidá midjiide, ja čájehat ge lagasvuođa iežamet lagamuččaide, lohká Lønmo.
Son dadjá ahte 50 olbmo rádji guoská maiddái hávdádemiide. Olusat maid jerret ahte ii go sáhte addit sierralobi vai eambbosat besset girkus dahkat earrodearvuođaid jápmán olbmuin.
– Muhto njuolggadusat leat áibbas čielgasat, deattuha proavás.
Ii sáhte spehkastit
Girkoráđđi oaivvilda ahte girkuin lea buorre bajilgeahčču go čohkkánsajit leat merkejuvvon ja beaŋkkat leat láhttis gitta. Muhto dan ektui lea vástádus áibbas čielggas, ahte stuolut galget gitta láhttis, muhto girkobeaŋkkat eai leat stuolut. Danne ii gávdno dan ektui spiehkastat.
– Lea váivi oapmahaččaide go eai sáhte suovvat buohkaid geat háliidit boahtit hávdádeapmái. Morrašis maiddái šaddet válljet 50 olbmo geat sáhttet leat mielde girkui. Dađi bahábut eai sáhte mii maide dahkat dainna, dadjá Sis-Finnmárkku proavás Egil Lønmo preassadieđáhusas.
Juovlamánu álggus galget boahtit ođđa njuolggadusat.
– Mii sávvat ahte dalle šaddá buoret dilli fas, dadjá proavás loahpas.