Bismmat miehtá Norgga spiehkastit njuolggadusain, ja ávžžuhit girkuid doallat hávdádanseremoniijaid main ii leat oskkolaš sisdoallu.
Norgga girku Bismmačoahkkin mearridii gaskavahkku addit girkuide lobi spiehkastit mearrádusas movt geavahit girku koronaáiggis. Bismačoahkkin ávžžuhit ahte girkut fállet hávdádemiid main ii leat oskkolaš sisdoallu jus eai leat eará vejolašvuođat, čállá NTB.
– Norgga girku lea dehálaš servvodatinstitušuvdna. Mii háliidit veahkehit buohkaid dákkár heahtedilis, ja danne addit mii dan vejolašvuođa, ahte sii geat eai leat oskkolaččat besset doallat hávdádanseremoniija min visttiin, lohká Norgga girku Bismmačoahkkima sadjásaš preses Atle Sommerfeldt.
– Mii háliidit veahkehit maiddái daid bearrašiid geat eai leat oskkolaččat oažžut gutnálaš seremoniija, lohká Sommerfeldt.
Sommerfeldt ii loga gal vejolažžan gokčat oskusymbolaid girkuin.
Humanehtalaš lihttu, Human-Etisk Forbund (HEF) atná arvvus Norgga girku árvalusa.
– Oallugiidda šaddá jáhkkimis buoret doallat hávdádanbottuid girkus go valáštallanlanjas, dadjá HEF Bærum báikkálaš searvvi jođiheaddji Kai Mjaanes NTB:i.
