60 jahkásaš dievdu lea dál dubmejuvvon 21 jahkái giddagassii go gottii eamidis ja biebmobártnis diibmá.
60 jahkásaš dievdu lea dál dubmejuvvon 21 jahkái giddagassii go gottii eamidis ja biebmobártnis diibmá.
Hålogalándda lágamánniriekti čuovvolii Nuorta-Finnmárkku diggegotti, ja dubmii seamma ládje, čállá NRK.
Pimsiri Songngam (37) ja su 12 jahkásaš bárdni Petchngam godduiga diibmá borgemánu. Duomus čállá lágamánneriekti ahte goddin lei erenoamáš fasti.
Eai lean geahppudeaddji dilit
Lágamánneriekti cealká ahte goddimis ledje čielga mearkkat ahte lei ovdagihtii plánejuvvon. 60-jahkásačča eamit šattai vuos oaidnit go su bárdni báhččui ja roavvát roasmmehuvai, ovdal go ieš báhččui, bártnis oainnus.
– Sudnos ii lean vejolašvuohta várjalit iežaska, ja sudnos ii lean vejolašvuohta beassat báhtui, čállá lágamánneriekti. Sii eai gávdnan geahppudeaddji diliid áššis.
60-jahkásaš Girkonjárgalaš lea dovddastan ahte ferte leamaš son gii lea goddán, muhto lea čilgen ahte ii muitte. Su eamit ja bárdnebealli báhččuiga oaivái hávláriin, lahka.
– Daid dieđuid vuođul maid son lea ožžon, de lea dovddastan goddán eamida ja bártni, logai dievddu bealušteaddji Stein Rønning, dalle go guoddalanášši álggii borgemánus.
Logai ahte áiggui baldit
60-jahkásaš lea čilgen ahte manai geallárii rádjui ja vieččai hávlára mainna áiggui baldit eamidis. Dikkis son logai ahte ii ipmir manne lea gealdán bissu.
Diggegotti duopmárat eai jáhkkán dievddu čilgehussii ahte áiggui duššo baldit.
Dievdu roasmmehuvai ieš bahuid go geahččalii iežas báhčit hávláriin.
