Odne álget Girkonjárggabeaivvit ja oallugat ledje boahtán geahččat rahpama. GEAHČA FILMMA!
Mátta-Várjjaga sátnejođiheaddji Rune Rafaelsen rabai Girkonjárgga beivviid oanehis sártniin mas son namuhii mii lea geavvan Mátta-Várjjagis diimmá Girkonjárgga beivviid rájes. Earret eará humai dan birra go gielda lea váldán vuostá badjelaš 5000 dorvoohcci ja stuora fitnodat Sydvaranger AS koŋkánii, ja gaskkal 350-400 olbmo masse barggu. Sátnejođiheaddji namuhii dál sii leat bidjan doaimma ásahit 300 ođđa bargosaji.
Olu olmmoš
– Dat lea hui suohtas, lea olu olmmoš. Šattai fiinna dálki maid, dat láve measta juohke jagi fiinna dálki Girkonjárggabeivviin. Mun láven leat juohke jagi mielde ja maiddái lean barggus juohke jagi go dát beaivvit leat, muhto ferte liikká finadit geahččamin, ja dalle válddán bottoža barggus vai beasan fitnat dáppe. Lea fearamii maid sáhttá vásihit dáppe, musihka, ja beassá geahččat vuovdinbuvrriid gálvvuid, ja dieđusge deaivvadit olbmuiguin, lohká John Henrik Mienna gii lea Guovdageainnus eret, muhto orron Mátta-Várjjagis dan rájes go álggi Girkonjárgii joatkkaskuvlii.
Deaivvadit olbmuiguin
– Dáppe leat olu olbmot ja hui olu maid oaidná, nu lea hui somá. Dáppe beassá ollu oastit ja geavahit ollu ruđa. Dat mii lea buot suohttaseamos lea go leat nu ollu olbmot geat bohtet ruovttobáikái ja beassá deaivvadit boares oahppásiiguin, dadjá Kjetil Varsi gii lea Deanus Sirpmás eret.
– Mun lean dán háve orron dáppe gávcci jagi, muhto lean dáppe orron veaháš ovddas maŋás jagiid mielde, nu lea somá beassat deaivvadit boares oahppásiiguin, lohká son.
Iešguđetgelágan doalut
Leat doalut iešguđetgelágan beroštumiide, sihke mánáid váras ja ollesolbmuide. Ovdamearka maid mánát besset vásihit Girkonjárggabeivviin lea heasttain riidet, mánáidshowat ja mánáidkino. Ollesolbmuide lea konsearta man Jørn Hoel doallá, ja sii besset maid leat mielde digaštallamis Mátta-Várjjat sátnejođiheaddjin mo dilli lea gielddas. Geahča olles prográmma kirkenesdagene.no.
Geahča Girkonjárgga beivviid rahpančájálmasas filmma ja govaid!
