-Almmuhus-
OĐĐASATGirkonjárgalaš vuittii 2 miljovnna

Girkonjárgalaš vuittii 2 miljovnna

-

-

Liv Elin Stabell, guhte lea Girkonjárggas eret, vuittii ikte guokte miljovnna Joker-spealus.

Stabell vuittii guokte miljovnna ruvnnu Norsk Tippinga Joker-spealus. Ieš nisu ii lean mielde sáddagis telefuvnna bokte, čállá Norsk Tipping preassadieđáhusastis.

 

Vuosttaš vuoitu lei 411 000 ruvnno, ja dihtor de ieš válljii galggai go vulos vai bajás mannat. Liv čuovui spealu TV bokte, ja dat lei oalle gelddolaš sutnje.

Nuppi logus válljii mášiidna boastut ja nu gahčai vuoitu fas álgovuitui. Njealját logus dattege iđii Joker, ja nu vuittii ge 2 056 000 miljovnna ruvnnu.

 

Huikkas ja biškkas

– Jua, dát šattai duođaid gelddolaš. In dieđe nagodan go hállat ge duinna, čaimmai son go Norsk Tippingas riŋgejedje sutnje dakka maŋŋil sáddaga.

Vuoiti muitalii iežas geahčen šaddan oalle rieja dan botta go speallu lei jođus.

– Mii leat máŋggas čoahkkanan deike, ja de šattai huikkas ja biškkas. Lei somá beassat dása searvat, ja maiddái vuoitit alimus vuoittu, logai Liv.

 

Guvttiin miljovnnain lohká soaitit bartta stuoridit.

– Mis lea bearaš sturron go mánát leat oažžugoahtán mánáid, nu ahte soaitit bartta stuoridit. Muhto dan ferte oaidnit, fertet vuos bures smiehtastit, dadjá Liv Elin Stabell.

 

-Almmuhus-