Girjás čearru lea nu go diibmá mearridan maŋidit rievssatbivddu golmmain vahkuin.
Ruoŧas álgá dábálaččat rievssatbivdu buot duottarguovlluin borgemánu 25. beaivvi, muhto dál lea Girjás čearru mearridan maŋidit rievssatbivddu golmmain vahkuin. Seamma go dahke diibmá ja báikkálaš bivdit besset easka bivdit čearu eatnamiin maŋŋel go čearru lea geargan gárddástallamis.
Báikkálaš bivdit váikkuhuvvojit go Girjás čearru gidde gávcci guovllu oktiibuot logi guovllus čearu eatnamiin.
Girjas čearu ságadoalli Ingemar Blind dadjá NSD aviisii ahte sii áigot ealu čohkket ja danin leat gidden guovllu.
– Mii áigut ealu čohkket ráfis. Muhto maŋŋel čakčamánu 15. beaivvi leat geargan ja dalle bivdit besset ráfis bivdit vai eai ráfehuhte nuppiid eaige šatta dušši riiddut, dadjá Blind.
Norrbotten bivdulihtu jođiheaddji Daniel Widman moaitá mearrádusa ja dadjá ahte bivdu váikkuhuvvo.
– Báikkálaš bivdit eai galgan váikkuhuvvot lei čearru lohpidan. Muhto dál min bivdit váikkuhuvvojit sihke goas ja geat besset bivdit, cealká son NSD aviisii.
