Otne lágiduvvo Suns Europe unnitlogugielaid lávlungilvu, ja das leaba oappášguovttos Sara Marielle Gaup Beaska ja Risten Anine Kvernmo Gaup mielde iežaska ođđa álggahuvvon joavkkuin man namma lea OZAS.
Otne lágiduvvo Suns Europe unnitlogugielaid lávlungilvu, ja das leaba oappášguovttos Sara Marielle Gaup Beaska ja Risten Anine Kvernmo Gaup mielde iežaska ođđa álggahuvvon joavkkuin man namma lea OZAS.
– Lea somá beassat dakkár gilvvus mielde, go ledne áibbas ođđa musihkka joavku. Dát šaddá goalmmát konsearta OZAS joavkkus, lohká Gaup Beaska.
Vurkejuvvon ohcii
OZAS lea oappážagaid Risten Anine ja Sara Marielle Gaupa (Adjágas, Arvvas) áibbas ođđa musihkkalaš mátki. Soai leaba árbevirolaš juoigit, ja soai leaba dovddus juoigi ja luohtebiddji Ánte Mikkel Gaupa nieiddat. Soai seaguheaba kultuvrralaš árbbi ođđaáigásaš šuoŋaiguin ja lávlumiin, čálliba teavsttaid fáttáin mat leat lahka sudno váimmuid, vurkejuvvon ohcii.
– Ledne válljen nama OZAS, danin go ohca han lea lumma mii lea váimmu lahka, gosa vurke divraseamos dávviriid, lohká Gaup Beaska.
Miehta Europa
Gaup Beaska lohká lea gelddolaš eará unnitlogugielaid musihkkariiguin deaivvadit.
– Lea miellagiddevaš oahpásnuvvat eará čuojaheddjiin dáppe, ja oahppat eambbo sin giellahástalusaid birra. Dát gilvu lea unnitlogu-gielaide, buohkat lávlot iežaset gillii, ja nu moai ge sámegillii. Joavkkut leat boahtán miehtá Europa, ja beassat gullat gielaid maid ii dávjá muđui gula. Munnos lea gitáračuojaheaddji Viktor Bomstad mielde, ja leat vel guokte veahkkečuojaheaddji geat leaba dáppe eret, muitala son.
Vuos ain veaháš čiegus
Suns Europe unnitlogugielaid lávlungilvvuin leat ovcci joavkku mielde, ja Ozas joavku searvá lávlagiin “Mánnávuođa muittut”.
– Fertiime ovtta beaivvis sáddet gilvui lávlaga/luođi nu ahte sáddiime lávllaluođi man ledne gohčodan “Mánnávuođa muittut”. Dát lea áigá bidjon, ja ii leat dakkár go Ozas lávlagat muđui leat. Muđui moai lávlo maid eŋgelasgillii, ja seaguhetne iešguđetge šaŋgeriid. Munnos lea ain veaháš čiegus munno prošeakta, go lea vuos nu ođas. Moai áigo almmuhit šuoŋaid «soundcloudii» mannjel juovllaid, gal dii de beassabehtet gullát, lohká Gaup Beaska.
Vejolaš jienastit
Gilvvuin nammada jury ovtta vuoiti ja nuppi vuoitti mearridit guldaleaddjit jienasteami bokte, maid sáhttá jienastit maiddái Sun Europe neahttasiiddu bokte. Gilvu álgá diibmu 21.00 ja sáhttá geahččat njuolggosáddagis neahtas.
“
