Álttá nieida, Emilie Kristoffersen, lihkostuvai bures mannan vahkkoloahpa Norgga cupas, Gålås. Dál lea gearggus mihtidallat fámuid máilmminásttiiguin Lillehammeris.
Álttá čuoigi, Emilie Kristoffersen čuoiggai Norgga cupas mannan vahkkoloahpa, Gålås.
Go doppe oaččui goalmmát ja viđat saji, de lea stuora vejolašvuohta ahte beassá čuoigat máilmmi cupas Lillehammeris vahkku maŋŋel Gålå.
Beassá čuoigat
Mánnodaga almmuhii Norgga čuoiganlihttu geat besset ovddastit Norga Lillehammeris.
Dán listtus leat guokte áltálačča, Emilie Kristoffersen ja Finn Hågen Krogh. Kristoffersen galgá čuoigat skiathlon, Krogh fas sprintta ja skiathlon.
Skiathlon lea sotnabeaivvi, ja lea 7,5 km árbevirolaš čuoigan ja 7,5 km luisten.
Norgga joavku
Norgga čuoiganlihttu searvá 15 čuigiin lávvordaga sprintii, ja 15 čuigiin sotnabeaivvi skiathlonii máilmmi cupa vahkkoloahpa.
Emilie Kristoffersen gilvaleaddjit leat Marit Bjørgen, Ingvild Flugstad Østberg, Kathrine Rolsted Harsem, Astrid Uhrenholdt Jacobsen, Ragnhild Haga, Maiken Caspersen Falla, Heidi Weng, Silje Øyre Slind, Thea Krokan Murud, Mari Eide, Anna Svendsen, Silje Theodorsen, Tiril Udnes Weng ja Anne Kjersti Kalvå.
