Unjárgga gielddadoavttir gielda dál olggobealde ássiid boahtimis barttaide. Son lea maid gidden gieldda skohterláhttuid olggobealde ássiide.
Unjárggas lea dán vahkus duođaštuvvon ovtta olbmos koronavirus. Unjárgga gielddadoavttir lea dál mearridan gieldit olbmuid geat eai oro gielddas geavaheames barttaid dahje astoáiggeviesuid. Gielda lea maid gieldán olggobealde ássiid geavahit gieldda skohterláhttuid. Gielddus lea mearriduvvon vai eastadit koronavirusa (Covid-19) leavvamis.
Gielddadoavttir maid ávžžuha olbmuid garvit johttimis rastá gielddarájá, jus ii leat dárbu.
Gitta
Doavtterkantuvra lea gitta otne bearjadaga njukčamánu 20. beaivvi. Deanu šalddi doavtterkantuvra lea rabas, dieđiha Unjárgga gielda.
