Harry Johansen ja Torill Olsen leaba ožžon doarjaga ráhkadit filmma giláža birra mii rahčá ceavzit stuoraservvodaga veahki haga.
Harry Johansen ja Torill Olsen leaba ožžon doarjaga ráhkadit filmma giláža birra mii rahčá ceavzit stuoraservvodaga veahki haga.
Harry Johansen ja Torill Olsen ráhkadeaba filmma Njeareveaji ássiid birra geat rahčet ásahit luotta iežaset gilážii, gosa dál ii beasa eará go fatnasiin. Davvi-Norgga filbmainstituhtta lea dál juolludan filmma buvttadeapmái 350 000 ruvnno.
– Mii orrut Norgga stuorimus fylkkas ja oaidnit go gilážat báhcet ávdin gillin min lagasbirrasiin. Máŋgasat vuollánit ja fárrejit eret civkkátkeahttá. Muhto muhtumat báhcet doarrut vai gilli ceavzá, nu go Njeareveaji giláš, gos ássit oaivvildit ahte sis lea riekti oažžut biilaluotta ja infrastruktuvrra maid servvodat gokčá ekonomalaččat, nu go eará stuorát báikkit ožžot, muitala Harry Johansen gii ieš orru gilážis mii rahčá ceavzit ja birget Deanus.
Filbma mii čuvge sentraliserema
Filbma lea Davvi-Norgga muitalus, gos olbmot leat mearridan eallit alternatiiva vuogi mielde norpmaid vuostá. Filbma guoskkaha TV-ráiddu «Bearrašat mátkkošteame», muhto «giláš mii rahčá ceavzit»-filbma ii dušše muital alternatiiva ja gelddolaš eallinvuogi birra. Gažaldagat nu go: Lea go buohkain riekti orrut das gos háliidit? Galgá go servvodat máksit ja heivehit infrastruktuvrra vaikko gosa? Filbma muitala nanu olbmuid birra geat eai vuollán Njeareveajis. Sii leat dál stuorimus rahčamušaid siste go háliidit oažžut luotta gitta Njeareveaji rádjái.
Filbma čuvge sentraliserema ja regionaliserema mat dagahit ahte unnit gilážat eai šat ceavzze.
Dovdá bures rahčamuša
Torill Olsenii, gii lea journalista ja boaittobeal guovlluid bealušteaddji, ii lean váttis álgojurdagis vuolggahit barggu. Sus leat fuolkkit Njeareveajis ja dovdá bures man guhká sii leat bargan sihke luotta oažžut, fanasfievrrideami, skuvlla ja digitála infrastruktuvrra ovddas.
– Mu mielas lea vuoigatmeahttun go eisseválddit dušše barget stuorit báikkiid ja gávpogiid heivehallat, eai ge veahket nuorra olbmuid ássát smávit gilážiidda. Buot vearrámus lea go ii leat šat almmolaš digaštallan boaittoguovlluid ja sentraliserenságastallan. Lea balddihahtti jaskat go allajienat sentraliserentoga jupmá Norggas ja Skandinavias alla leahtuin, muitala Torill Olsen.
Álggaheaba barggu boahtte vahkku
Go boahtte vahkkus álggahit filbmabarggu, de lea goalmmát geardi go Olsen ja Johansen ovttasbargaba. 2011s ráhkadeigga filmma «Bálkestuvvon merrii», 2013s ráhkadeigga filmma «Dat buorit Veahkit» mat čájehuvvo NRK TVs. Lea maid mihttun dan ođđa filmma čájehit TVs.
Filbmabarggus váilo ain oassi ruhtadeamis, ja plánaid mielde galgá filbma gárvánit jagi 2017s. Harry Johansen lea govvejeaddji, heivejeaddji ja produseanta. Torill Olsen ohcá dieđuid filbmii, lea journalista, mánusovddasvástideaddji ja veahkkeproduseanta.
