-Almmuhus-
-Almmuhus-
OĐĐASAT – Giitevaš go áigu muinna deaivvadit

– Giitevaš go áigu muinna deaivvadit

-

-

Jovsset Ánte Sara stuoraoabbá ja dáiddár, Máret Ánne Sara, deaivvada ON:a olmmošvuoigatvuođaid erenoamášraportevrrain ja áigu humadit suinna ášši birra movt stáhta gieđahallá su vielja.

Stuoraoabbá ja dáiddár Máret Ánne Sara lea dáiddalaš beliin čuvvon diggeproseassa mas su unnavieljaš lea leamaš guovvamánu 2016 rájes.

Son lea bohccooivviid bidjan diggevisttiid olggobeallai Deanus ja Romssas, ja Stuoradikki olggobeallai go Jovsset Ánte ášši meannuduvvui Alimusrievttis. Son lea ceggen sámi leavgga máilmmi stuorámus dáiddačájáhusas Documentas, ja lea mátkkoštan Eurohpa miehtá dáidagiin mainna lea ovddidan ja boktán digáštallama vieljas áššis ja sámiid rivttiid duolbmuma. Son lea demonstreren sihke olggobeale ja siskkobealde Stuoradikki. Lea maid deaivvadan dronnet Sonjain ja muitalan sutnje dan duođalaš ášši birra ja dan rievttehis dili birra mii lea nuorra boazodoalli Jovsset Ánte Saras.

 

Dál áigu Sara deaivvadit ON Olmmošvuoigatvuođaid erenoamášraportevrrain  David R. Boyd.  

– Lean giitevaš go erenoamášraportevra áigu muinna deaivvadit, ja go oažžut vejolašvuođa persovnnalaččat muitalit rievttehis dili birra man vuolde mii eallit, ja movt stáhta meannuda min olmmožin, kultur- ja riekteguoddin, lohká Sara preassadieđáhusas, gii ráhkkana čoahkkimii mii lea Guovdageainnus čakčamánu 19.beaivvi eahkedis.

 

Dahkan priváhta šiehtadusa

– Stáhta lea hilgon Olmmošvuoigatvuođakommišuvnna ávžžuhusa vuordit bággodoaimmain mii lea mu vielja vuostá gitta ON lea dahkan mearrádusa váidagis mii lea sáddejuvvon olmmošvuoigatvuođakommišuvdnii. Mu viellja lea ferten priváhtarievtti bokte dahkat šiehtadusaid addit ealus ja sáddet dan nuppi siidii. Min bohccot, rievttit ja kulturárbi lea gáddjon nu guhká go boazodoalli, gii lea váldán  bohccuid su vuollai, sáhttá doallat daid iežas luhtte. Gitta 2020 giđđii. Mii dan maŋŋel dáhpáhuvvá, eat dieđe. Mii ferte luohttit ahte riikkaidgaskasaš riekteservvodat sáhttá min veahkehit, lohká Sara ovdal čoahkkima.

 

Beasai stuora golus

Čakčamánnui lei bággonjuovvan dieđihuvvon, mii lea dat mánnu mas buot eanemus barggut leat Fála orohagas.

Preassadieđáhusas maid Máret Ánne Sárá lea sádden čilgejuvvo ahte áidebargguiguin čakčamánus ádjánit birrasiid 3-4 vahkku go orohat čohkke ealu, ja osiid mielde vuojehit ealu nannámii gos olles ealu boahkuhit ja merkejit misiid seammás go njuvvet niesttebohccuid ja gávpečorragiid. Stáhta ii leat áigon vuordit bággonjuovvamiin ja maŋidan barggu, gos bargogolut ledje šaddat unnibut Jovsset Ánte Sarai, gii bággehalla gokčat bággonjuovvangoluid. 

Jovsset Ánte Sara beasai eret dan rehkegis mii livčče gártat máksit 4-6 miljovnna ruvnno, jus stáhta livčče álgán bággonjuovvamiin seamma áigge go miessemearkun lea čakčamánus.

 

 

- Advertisement -
-Almmuhus-