Ávvir lea čohkken lohkkiid árvalusaid ja dá leat 12 evttohasa geaid sáhtát jienastit:
Minna Näkkäläjärvi: Álggahii nammačoaggima ruvkedoaimmaid vuostá Suoma Giehtaruohttasis, ja nákcii čoaggit olles 37 200 vuolláičállosa ja nu oaččui fuomášumi áššái mii váikkuha viidát sámi ealáhusaide.
Matti Berg Blind: Girjás čearu jođiheaddji, čearru mii lea garrasit bargan oažžut boazosámiid rivttiid dohkkehuvvot Ruoŧa stádas. Ođđajagemánus 2020 čearru vuittii Ruoŧa stáda vuostá Alimusrievttis, ja besset hálddašit bivddu ja guolásteami iežaset čearu eatnamiin.
Elin Anna Labba : Almmuhan girjji «Hearrát dat bidje min», man ovddas oaččui Labba August bálkkašumi mii lea Ruoŧa stuorimus girjjálašvuođabálkkašupmi. Bággojohtimiid birra leimmet unnán gullan, vaikko lea dehálaš oassi min álbmoga historjjás.
Ella Marie Isaksen: Son beaggá viidát iežas musihkain ja dan oktavuođas maid ovddida sámi kultuvrra ja doarru luonddugáhttenáššiin. Elle magasiidna lea juo dan oktavuođas nammadan su okta dain čielgaseamos ja nannoseamos jienain olles buolvva ovddas Norggas dán jagi.
Vegard Bjørsmo: Ollii guhkás «Stjernekamp» lávlungilvvus, gos son maiddái lávllui sámegillii. Son lea maid ožžon ollu nuorra fánssaid iežas Blime-dánsa lávlumiin sámegillii, ja lea beaggán miehtá riikka.
Lemet Máhtte Eira Sara: Lea gávcci mánus jorgalan 14000 sáni «Minecraft» spealus eŋgelasgielas davvisámegillii, mii lea eanemusat vuvdojuvvon dihtospeallu máilmmis. Sámediggi jugii sutnje dan ovddas Sámi giellaloktenbálkkašumi 2020.
Anders Nils Peder Sokki: Geahččalan iežas vuoigatvuođaid ovddas doarrut ja čalmmustahttán man hearkkit boazoeaiggádat sáhttet leat vuoigatvuođaid dáfus Norgga lágaid ektui. Dál loahpas jagis lea ožžon heaitingohččuma.
Maria Sunná Mikkelsen: Journalista, gii dál bargá VG ođashoavdan, lea vuoitán riikaviidosaš bálkkašumiid. Čakčat vuittii olmmošvuoigatvuođabálkkašumi áššiidis ovddas. Ovdalaččas leat juo vuoitán, Schibsted Journalism Awardsas, ja guktii «Den Store journalistprisen».
Torstein Appfjell ja su orohat Jillen njaarke lea guhkit áiggi dáistalan bieggafápmohuksemiid vuostá. Sii leat vuoittáhallan dikkis go geahččaledje bissehit huksemiid sin johtingeainnuid ja guottetbáikkiid alde, ja dubmehalle máksit 1,7 miljovnna áššegollun.
Leif Arne Jåma ja su orohat Fovsen Njaarke, geat dáistalit bieggafápmohuksemiid vuostá. Lágamánneriekti dubmii Fosen Vinda máksit 89 miljovnna ruvnno orohahkii vahága ovddas. Ášši lea guoddaluvvon Alimusriektái, ja Stáda lea gohččon Ráđđehusadvokáhta bieggamillofitnodaga doarjut dikkis.
Ingir ja Marja Bål Nango: Oappášguovttos leaba lokten sámi filmmaid internašunála dássái go leaba vuoitán máŋggaid bálkkašumiid «Njuokčamat» filmmain, nugo Rhode Island ja Palm Springs internašunála filbmafestiválain. Sudno filmmat besse maid máilmmi stuorámus eamiálbmotfilbmafestiválai, imagineNATIVE Film + Media Arts Festival.
Dávvet Bruun-Solbakk: Son lea bonju sápmelaš gii cuvke tabuaid juohke beaivvi NRK Sámi nuoraidrádioprográmmas, ja son dahká dan vel hui lunddolaččat. Son lea ovdalaččas leamaš njunnošis Sápmi Pride doaluin ja muđui nuoraidpolitihkas.
Jienasteapmi giddejuvvo sotnabeaivvi 27.12 dii. 24.00
