-Almmuhus-
OĐĐASAT Giellavahkkui ráhkkanit

Giellavahkkui ráhkkanit

-

-

Álttá giellaguovddáža bealis leat olles leavttuin ráhkkaneamen álgoálbmotgiellajagi giellavahk­kui. Sámegiella galgá oidnosis miehtá Álttá.

– Leat sámegiel sániiguin čiŋa­heamen Álttá gávpoga. Govaid heaŋgume gávpogis mas leat sámi sánit sihke sámegillii ja dárogillii. Mis galget mállásat boradanbáikkiin, juoigankurssat ja catwalk. Dát lea dušše uhca oasáš min plánas, dadjá prošeaktajođiheaddji Marit Hætta Øverli.

 

Álgo­álbmot­giella­jahki

Ovttastuvvon Našuvnnat mearridii 2016:s ahte jahki 2019 lea riikkaidgaskasaš álgoálbmotgiellajahki. UNESCOS lea ovddasvástádus jođihit IYIL 2019-barggu.

Giellajahki galgá čalmmustahttit ja ovddidit álgoálbmotgielaid dili. Máilmmi sullii 7000 gielas sáhttet máŋga duháha giela jávkat ja máŋga giela leat juo jávkan.

Álgoálbmotgielat leat earenoamáš hearkkes dilis. Sullii 2680 giela leat áitojuvvon. UNESCO giellalisttu jelgii leat sámegielat áitojuvvon dege duođalaččat áitojuvvon gielat:

Davvisámegiella lea vissásit áito­juvvon giella.

Julev-, gieldda- ja lullisámegiella, anárašgiella ja nuortalašgiella leat garrasit áitojuvvon gielat.

Ter-, ubmi- ja bihtánsámegiella leat kritihkalaččat áitojuvvon gielat.

UNESCO giellalisttu jelgii leat áhkil­sámegiella ja giemasámegiella oalát jávkan.Gáldu: samediggi.no

 

Vuosttašceahkkefálaldat

Sámi giellavahkku álgá golggot­mánu 21. beaivvi ja bistá vahkku.

Ulbmilin lea buoridit sámegielaid stáhtusa, ja buoridit máhtu sámi giela ja kultuvrra birra olles servo­dagas.

Juste dán vahkus galget sámegielat gullot ja oidnot juohke sajis.

 – Háliidan rahpat iežamet váimmu. Galgá leat vuosttaš­ceahkkefálaldat. Eai dušše sidjiide geat hupmet sámegiela, muhto sidjiide maid geat eai máhte, dadjá Marit Hætta Øverli.

 

Stuorra beroštupmi servodagas

Sámi giellavahkus sii ovttas oainnusmahttit ja buoridit máhtu sámegielaid birra olles servodagas.

Hætta rámida priváhta ja almmolaš ásahusaid, ealáhuseallin, priváhta olbmuid Álttás go leat searvan oainnusmahttit sámegielaid dán vahkus. 

– Mis leat olu ovttasbargo­guoimmit, dovddan ahte Álttás váldet min bures vuostá, álot nu positiivvalaččat, sii háliidit veahkkin loktet min giela, dadjá Hætta Øverli.

 

- Advertisement -
-Almmuhus-