Guovdageainnu nieida Risten Biret Elle Eira vuittii Giellamiella čállingilvvu.
Guovdageainnu nieida Risten Biret Elle Eira vuittii Giellamiella čállingilvvu.
Guovdageainnu nieida Risten Biret Elle Eira vuittii Giellamiella čállingilvvu. Son lei čállán čállosa Sohkariekti. Jury rámpui čállosa, ja lohke dan miellagiddevažžan, ja darvehahtti čálusin. Dasa lassin lohke dan bures čállon. Vuoitu lea 12 000 ruvnno. Vuoitu juhkkojuvvo Girjjálašvuođabeivviin Ájas, Johkamohki márkaniid oktavuođas.
Vuoiti lohka álo liikon čállit.
— Čállin lea álo leamaš guovdu mu váimmu, ja mun lean liikon čállit dan rájes go ohppen liántta gieđahallat
Sámegiella rikkis ja girjás giella
Son lea Guovdageainnus eret, muhto dál orru Romssas, gos son studere psykologiija Universitehtas.
— Mu mielas lea sámegiella nu rikkis ja girjás giella mii ánssášuvvo ihtit oidnosii ja man árbi galggašii seailluhuvvot. Sámegiella lea nu botnihis čieŋal ja das álo lea juoga ođas oahppat, ja ii giige máhte das buot – dat lea mu mielas nu hearvái ja hástaleaddji. Nu iešguđetgelágán čállosiid ja muitalusaid bokte ihtet ge álo ođđa erenoamášvuođat ja fuomášumit gielas; máŋggalágán seaguhusat sihke sániin ja cealkagiin, ja dasa liikon mun
Golbma gilvaleaddji
Ledje boahtán olu čállosat, muhto jury lei válljen golbma gilvaleaddji. Dat guokte eará gilvaleaddji leigga Lisa Marainen Gárasavvonis eret, ja Johan Sandberg McGuinne Likšus eret.
Movttidahttit nuoraid čállit čállosiid
Bágo čálliidsearvi lágida gilvvu, ovttas Nuorat aviissain ja Giellaguovddážin. Gilvu lea nuoraide gaskkal 18 ja 35 jagi, ja oažžu čállit vaikko makkár šáŋŋeris, beare lea sámegillii. Dán jagi lei fáddá gilvvus “Inge mun diehtán geainna mun humadin”. Gilvu galgá movttiidahttit nuoraid sámegillii čállit čállosiid.
