-Almmuhus-
-Almmuhus-
OĐĐASATGielladohkká sukseassa

Gielladohkká sukseassa

-

-

Seamma beaivvi go Giella­dohkkát ilbme, de ožžo buvttadeaddjit ­badjel 100 diŋgojumi. Dál vurdet máŋga čuođi ođđa vávvá maiguin sámi mánát besset duhko­raddat. 

Guovvamánus ilbme sámegielat Gielladohkkát mat galget stoahkama bokte ovddidit ja stimuleret mánáid giela. Dát duhkoras ja giella­resurssa leamaš bivnnut. 

– Mii leat dássážii vuovdán moadde čuođi dohkká. Eat mii vuordán ná stuora beroštumi. Mii oaččuimet badjel 100 diŋgojumi dan beaivvi go almmuheimmet Gielladohkká ja dat lei hui somá, dadjá Gielladohkká buvttahábmejeaddji Tim Valio. 

 

Háliidii geahččalit

Guovdageaidnulaš Tim Valio lea hutkan Gielladohkká ja designen sisdoalu. 

– Go fuobmájin dán ráhkadit, de lei hállu geahččalit buvttadit moaddelogi dohkká. Muhto prošeakta stuorui sakka go ovttas­bargagohten Statpeda Sámi erenomášpedagogalaš doarjalusas. Sii čájehedje stuora beroštumi ja háliidedje ohcat doarjaga buvttadeapmái. Sámedikkis leat gáibádusat dan ektui man olu ráhkada go juolludit ruđaid, čilge Valio. 

Gielladohkká lea hábmejuvvon Sámis, muhto buvttaduvvo ­Kiinnás. 

– Mun lean leamaš fabrihkas ja oaidnán mo doppe barget. Munnje lei maid hui dehálaš vuolgit Kiinnái dáhkidandihte ahte nagodit buvttadit sámi lágan dohkká. Telefovnna bokte lea oainnat ­váttis čilget makkár dat lea, dadjá buvttahábmejeaddji. 

 


Gielladohkká buvttahábmejeaddji Tim Valio. Priváhtagovva

Lassi Gielladohkkát

Go Gielladohkás deaddila julggiid, gieđaid dahje oaivvi, de dat hállá.

Dat oahpaha mánnái doahpagiid, loguid ja lávlagiid.

Gielladohkká máhttá sihke davvi-, julev- ja ­máttasámegiela. 

– Mii leat vuovdán eanemus davvisámegiel dohkáid, ja daid leimmet maid diŋgon eanemus. Nubbin eanemusat leat vuovdán máttasámegiel dohkáid ja de julevsámegiel dohkáid, dadjá Valio ja muitala ahte leat gártan diŋgot ­lassi vávváid. 

– Justa dál leat máŋgačuođi Gielladohkká boahtimin stuora fatnasa mielde. Dat ollejit sullii mánu geahčen. Go buvttadeapmi dáhpáhuvvá nu guhkkin eret, de ádjána daid fievrridit deike. ­Olbmuin leamaš gierdevašvuohta vuordit vaikke buohkat eai ­soaitte fuomášan ahte diŋgojedje daid ovdagihtii, čilge son. 

 

Ođđa jurdagat

Gielladohkáid ostet eanaš mánná­olbmot ja mánáidgárddit.

Buvttahábmejeaddji Tim Valio dadjá ahte leamaš duhtavačča buktagiin. 

– Lean aivve ožžon buriid ­ruovttoluottadieđuid ja dat čájeha ahte sámi mánát ja váhnemat leat vuordán dákkár stoahkanhearvva, lohká son ja muitala ahte pláne eanet sámi duhkkorasaid buvttadit. 

– Gielladohkáid bivnnut­vuohta addá movtta jurddašit mo sáhttá eanet stohkosiid ráhkadit. Mii leat bargojoavkkus jo bargagoahtán ođđa jurdagiiguin, muhto dáid in háliit vel suođđat. Gielladohkká ektui sáhtán maid muitalit ahte dat lea ráhkaduvvon nu ahte dan lea vejolaš ovddidit teknologalaččat, dadjá buvttahábme­headdji Tim Valio. 

-Almmuhus-