Ráđđehus evttoha ođasmahtton nationálabušeahtas nannet gieldda ruhtadili gitta 2,3 milljárdda kruvnnuin. Juristtalihttu-Gielda mielas berrejit gielddat geavahit dáid ruđaid nannen dihtii gieldda siskkáldas gelbbolašvuođa vai nagodit buoridit ássiid riektesihkarvuođa ja bálvalusfálaldaga kvalitehta.
Ráđđehus čuoččuha ahte sis lea beroštupmi ahte norgalaččain lea buorre bálvalusfálaldat beroškeahttá gos sii ásset. Ođasmahtton nationálabušeahtas nannejit danin gieldda ruhtadili gaskal 1,8 ja 2,3 miljárddain kruvnnuin.
– Mii doaivut ahte gielddat oidnet ahte sis lea dárbu nannet gelbbolašvuođa vai nagodit addit gieldda ássiide láhkageatnegahtton bálvalusaid sihke skuvllas, bajásšaddama, dearvvašvuođa ja fuolahusa, mánáidsuodjalusa suorggis. Mii ávžžuhit ahte sii bálkáhit juristtaid iežaset hálddahusas, lohká Benedicte Gram-Knutsen preassadieđáhusas.
Rambøll iskkadeamis 2020:s bođii ge ovdan ahte 45 proseantta Norgga gielddain eai lean virgádan juristta. Dušše njealje proseantta gielddain leat vuoruhan skuvlla ja bajásgeassima ja dušše guhtta proseantta lea vuoruhan mánáidsuodjalusa suorggi. Gram-Knutsen deattuha dattetge ahte ii leat doarvái nannet gielddaid ruhtadili go dat ii mearkkaš ahte ássiid riektesihkarvuohta nannejuvvošii.
– Mo sáhttet gieldda ássit luohttit ahte gielda čuovvu lágaid ja ahte gielda áimmahuššá ássiid riektesihkarvuođa, jus gielddas ii leat juridihkalaš gelbbolašvuohta? jearrá Gram-Knutsen.
Juristalihttu – Gielda ávžžuha buot gielddaid Norggas vuoruhit gildii juridihkalaš gelbbolašvuođa. Dat nannešii láhkageatnegahtton bálvalusaid kvalitehta mealgat.
