Divttasvuonas lea heahtedilli, oaivvilda gieldaministtar, ja bovde čoahkkimii gos ságastallet movt Divttasvuona áššiid galgá čoavdit ja čuovvolit.
Divttasvuonas lea heahtedilli, oaivvilda gieldaministtar, ja bovde čoahkkimii gos ságastallet movt Divttasvuona áššiid galgá čoavdit ja čuovvolit.
Sámediggepresideanta válddii initiatiiva sáddet rabas reivve ráđđehussii mas ávžžuhii ahte našunála eiseváldi ferte bargat áššiin.
Son gohčodii daid ollu rohcošanáššiid Divttasvuonas našunála tragediijan.
– Dilli Divttasvuonas lea nu duođalaš ahte lea dárbu sierra čalmmustahttimii ja veahkkedoibmii. Mii eat sáhte dohkkehit ahte nu máŋga gillájeaddji eai oaččo dan veahki masa sis lea dárbu, čállá sámediggepresideanta reivves ja lohká ahte suinna leat váldán oktavuođa ja muitalan ahte sin suohkan ii atte dan veahki maid sii dárbbašit.
Bovde čoahkkimii
Gieldaministtar Jan Tore Sanner lohká hirpmahuvvat ja vuorjašuvvat go gullá dáhpáhusaid birra.
Suohkana dilli lea hui duođalaš, ja lea dehálaš ahte gillájeaddjit ja lagamuččat ožžot dan veahki maid dárbbašit almmolaš bálvalusain, deattuha son.
– Stuoraservvodagas lea ovddasvástádus searvat go báikkálaččat vásihit dakkár duođalaš dili go dál lea. Dá lea servvodat mii vásiha heahtedili, ja sihke olbmot ja suohkan dárbbašit veahki, lohká Sanner.
Departemeanta áigu fargga bovdet Divttasvuona suohkana, Fylkkamánni, ránnjásuohkana ja eará guovddáš aktevrraid geat čuovvolit barggu, čoahkkimii gos digaštallet movt ovttas sáhttet sihkkarastit fálaldaga sidjiide geat dárbbašit veahki ja čuovvoleami, sihke oanehit ja guhkit áiggis.
Tabut hehttejit
Sámediggepresideanta Larsen rámida sin geat leat rahpasit muitalan iežaset vásáhusaid ja muitalan hearkkes áššiid seksualálaš illastemiid birra.
– Jávohisvuohta ja tabut hehttejit ahte dakkár rohcošeamit bissehuvvojit ja ahte ovddasvástádus addo vearredahkkái, lohká Larsen.
(©NTB)
