Olbmot guvlet telefuvnnaide ambulánssaid ovddas ja viegadit buohcciviesus. Finnmárkku buohcciviesuin leat ferten gevret olggos muosehis Pokémon Go- spelliid ja gieldit spealu.
Olbmot guvlet telefuvnnaide ambulánssaid ovddas ja viegadit buohcciviesus. Finnmárkku buohcciviesuin leat ferten gevret olggos muosehis Pokémon Go- spelliid ja gieldit spealu.
Finnmárkku buohcciviesuin lea dál” Pokémon «No Go». Nu čállet sii sierra preassadieđáhusas.
– Leat ferten gevret nuoraid ja pokémonariid olggos buohcciviesu vuostáiváldimis dál máŋga eahkeda maŋŋálaga, dadjá doaibmi klinihkkahoavda Girkonjárggas Geir Baathu.
– Dadjen go mun gevret? Oaivvildan dieđusge ahte čábbát bivdit sin speallat eará báikkis, lasiha son. Olbmot gal dieđusge ain ožžot bivdit pokémonaid, muhto ii juste buohcciviesuin. Dat muosehuhtte sihke buhcciid, oapmahaččaid ja bargiid. Dál lea okta pokestop fiskes sáttogássas váldouvssa guoras. Biillat vuojašit ja olbmo viegadit das ija beaivvi, sihke buohcciviesu siste ja olggobealde.
Fáhkka iđahagas
Gulahallanráđđeaddi Eilert Sundt, geas lea kantuvra Hámmárfeastta buohcciviesus, muitala doppe lea “pokémon gym” sadji jur su kánturláse vuolde.
– Dat lea juste muhtin nurkkis buohcciviesus, gokko ambulánssat galget vuodjit buohccivissui. De lea dieđusge várálaš jus leat olbmot guovlame telefuvnnaide jur nurkke duohken go ambulánsa boahtá garra leahtuin alit čuovggaiguin, dadjá son.
Danne leat sii dál gieldán olbmuid geavaheames “Pokémon Go” -spealu goappaš buohcciviesuid luhtte dahje siste.
Sádde eará pokestopaide
Eilert Sundt, gii ieš lohká juo «level 5» dási olahan “Pokémon Go” spealus, čállá son vázzila eret buohcciviesus go háliida bivdit pokemonaid bottuin, ja cuige maid eará báikkiide gos gávdnojit dat beakkán pokémonat maid hui oallugat dál oaguhit ja bivdet telefuvnnain.
– Gávdno goit pokestop buohccidivššárallaskuvllas ja maid Pizzabakeren báikkis dás vuolábealde buohcciviesu. Doppe sáhttá roahkka speallat nu ahte ii muosehuhtte buhcciid, ii ge leat ambulánssaid ovddas, loahpaha son preassadieđáhusas.
