-Almmuhus-
-Almmuhus-
OĐĐASATGielda váidá politiijaide

Gielda váidá politiijaide

-

-

Kárášjoga gieldda hálddašan-, doaimmahan-, ja mađašatnujođiheaddji, Helge Nystad, gohčoda beahcenjeaidima guovdu márkana bahádahkun ja lohká gielda váidá ášši politiijai. 

Kárášjoga gieldda hálddašan-, doaimmahan-, ja mađašatnujođiheaddji, Helge Nystad, muitala son lea fitnan govvemin dan logemat beazi maid muhtun olbmot leat njeaidán saháin mannan ija, maŋŋebárgga čuovganeapmái, guovdu márkana, biilaguođđinsajis gaskal ČálliidLágádusa ja Coop Prix gávppi. 

– Muhtimat leat mannan ija lobiheamet njeaidán beziid márkanis maid Kárášjoga gielda lei gilván čábbudahttin dihtii márkana. Ášši váidojuvvo ja mun fitnen daid govvideamen. Dát lea iešheanalaš dahku, go ii leat ovddidan iežas vuoigatvuođaid eiseválddiid bokte nu mo galggašii, čilge Helge Nystad gii gohčoda beahcenjeaidima bahádahkun. 

 

Ii masa ge ávkin

Helge Nystad muitala gielda ferte čorget eret dáid njeidon beziid. 

Lohká su mielas lea dego juhkan olmmoš vázzán ja njeaidán beziid soaittáhagas. 

– Mun ledjen dál čuojaheamen leansmánnii, sáhttet go váldit ášši ovdal go mii fertet čorget. Livčče velá njeaidán ávkin, muhto ii leat ii veaháš ge ávkin. Ávki livččii lean jus livčče rahppon johtolatsihkkarvuođa dihtii. Sullii logi beazi lea njeaidán, lohká Nystad.

 

Kárášjoga identitehta

Helge Nystad muitala lea Kárášjoga gielda mii lea gilván dáid beziid, čábbudahttin dihtii márkana.

– Mii leat geavahan ruđaid. Mun dieđán máŋggas eai liiko dasa, muhto liikká. Beahci lea Kárášjoga identitehta. Ii mis ábut gilvit máttašattuid deike. Beahci lea birrajagi ruonas ja dat njammá maid CO2, čitnadioksiidda ja buhtista áimmu. Jus áigot daid beziid eret, de eai galgga diktit biilamohtora jorrat das, joatká Nystad.

Lohká diehtit olusat eai háliidivčče dáid beziid guovdu márkana, ja lohká sii livčče sáhttán baicce njárbudahttit daid beziid.

Muhto deattuha ahte juohkehaččas geas lea vuodjinkoarta, lea geatnegasvuohta heivehit iežaset vuodjima vuodjindili mielde.

 

Suorggahan olbmuid

Kárášjohkalaš Roy Johnskareng oaidná Nystad ja fitná suinna gulaskuddamin gii son dáid beziid lea njeaidán.

– Mu mielas ii leat riekta olbmuin ahte ieža mannet sahát. Jus lea nu ahte beazit leat ovddas, livčče sáhtán váldit oktavuođa gielddain ja gohččut sin njeaidit daid muoraid mat galget njeidojuvvot. Ii leat riekta lobi haga mannat dáid beziid njeaidit. Dat han lea gielda mii lea gilván daid. Mii han leat gielda, lohká Roy Johnskareng. 

Maiddái Ingeborg Elisabeth Hansen doapmala Nystad lusa gullat mii lea dáhpáhuvvan.

Muitala iežas nu liikot beziide ja lávlesta Kárášjoga lávlaga. 

– Issoras. Mun healkkehin eske go dákko vázzen beatnagiin. Lihkus lea Helge Nystad ovtta oaivilis muinna. Jurdilin vuos ahte soaitá leat gielda, muhto eai doppe leat nu gáiggá. Gii son dán lea dahkan?

-Almmuhus-