-Almmuhus-
OĐĐASATGielda giddii dán lahtu seamma beaivvi

Gielda giddii dán lahtu seamma beaivvi

-

-

Ii gánnát vuodjit skuterlahtuid mielde mat leat giddejuvvon. Dát skutervuoddjit goit šattaiga vuojadit suttis ikte Iešjogas.

Jan Henrik Hætta lei vuodjime biillain ja bisánii geahččat go fuomášii guoktása geat leigga bártideame Iešjogas Jergula lahka. 

– Nubbi skutervuoddji orru dego geahččalan rasttidit dan sutti, ja darvánan jiekŋaravdii skuteriin. In dieđe lea go skuter leamaš oalát čázi vuolde, muhto gullen dat illá vulggii šat mohtor, ja son lei njuoskan badjeloivviid, dadjá son.  

 

Gidden

Go skohteris viimmat vulggii mohtor, de vuoddjái Hætta maid viidáseappot. Dákko Iešjoga mielde manná merkejuvvon skuterlahttu bajás. Kárášjoga gielddas duođaštit ahte Ássebávttis bajás leat ikte easkka gidden lahtu. 

 

Erenoamáš heajos jieŋat

 Kárášjoga leansmánnebálvá Arvid Næss ii lean gullan ievttá Iešjoga bártti birra, muhto son duođašta ahte dán jagi leat earenoamáš heajos jieŋaid jogain ja jávrriin. 

– Lea erenoamáš jahki go eai leat leamaš áktánas buollašat dán jagi. Lei hui oanehaš buolaš, ja njukčamánnu ja cuoŋománu lea leamaš erenoamáš bivval. Mun ávžžuhan ahte olbmot eai mana rašes jieŋaid ala. Ja go lahttu lea gitta, ii galgga goit mannat vuodjit dakko,  dadjá Næss.  Son dadjá ahte go ii goastta šat vuodjit lahtu mielde, de dat mearkkaša seamma go ahte lea gitta.

 

Skuterat billahuvvet

Son lohká gullan máŋgga sajis olbmuid doddjon johkii dahje jávrriide, oivošiidda ja joganjálmmiide ja nu bártahuvvan. Lihkus lea gal mannan bures singuin vaikko lea heaggavárálaš mannat rašes jieŋa ala. Muhto skohterat gal leat billahuvvan go leat njuoskan.

 

Garvve čáhppes jieŋa! 

Son lohká ahte mearragáttiin lea vel vearrát, doppe leat vel eambbo nálluluvvan jieŋat. 

 – Cuoŋu han lea vel mii dájuha olbmo go lea nu buorre siivu vuodjit. Dál go bijai vaza vel, de sáhttá olmmoš jáhkkit leat vilges jieŋat. Muhto buot váráleamos jieŋat leat čáhppes jieŋat. Go dakko vuojistat, lea dušše sokta, ja čalggihat dušše čađa, čilge Næss. 

-Almmuhus-