Guđa jagis leat lagabut 300 skuvlla giddejuvvon. 177 dain leat giliskuvllat main leat vuollel 50 oahppi.
Guđa jagis leat lagabut 300 skuvlla giddejuvvon. 177 dain leat giliskuvllat main leat vuollel 50 oahppi.
Juohke vahkku heaittihuvvo okta skuvla Norggas. Lagasbirasskuvllaid riikasearvvi vuosttašlektor emeritus, Kristoffer Melheim, lohká ahte leat eanaš giliskuvllat gos leat unnán oahppit mat heaittihuvvojit, čállá Nationen aviisa.
Guovddáš doaibma gilážis
Oslo ja Akershus allaskuvlla skuvladutki Tarjei Helland lohká ahte giliskuvllain sáhttá leat guovddáš doaibma lagasbirrasiin.
– Lea dehálaš geahčadit lagabut go árvvoštallá galgá go doalahit dahje heaittihit skuvllaid. Skuvla lea eanet go siskkáldas organisma. Dat lea viiddis doaibma, lohká son Nationenii.
30 jagi áigi go giddegohte giliskuvllaid
Vuosttašlektor Melheim ii loga ođđa áššin ahte giliskuvllat heaittihuvvojit. Heaittiheamit leat álgán jo 80-logu gaskamuttus. Melheim lohká ahte jus suohkanat mávssáše skuvlasáhtu ovddas, de oainnášii man stuora gollu dat lea.
– Buot kvalitehtamihtut čájehit ahte smávva skuvllain lea buorre dássi. Buoremus skuvla ohppiide lea dat mii lea lagamusas gos orrot. Das ii leat eahpádus, dadjá Melheim Nationenii.
Finnmárkkus leat 14 skuvlla heaittihuvvon maŋemus guđa jagis. Romssas leat 16 skuvlla, ja Nordlánddas ges 26 skuvlla heaittihuvvon. Oktiibuot leat 56 skuvlla heaittihuvvon Davvi-Norggas maŋemus guđa jagis.