Guovdageainnu suohkana sátnejođiheaddji govččai ovttatmano čoahkkima vuosttaš áššis juo, mii ii lean ii áššelisttus ge.
Veahá teknihkalaš hástalusaid geažil, de rahppui Guovdageainnu suohkanstivra, sátnejođiheaddji Hans Isak Olsena bokte. Otná suohkanstivračoahkkin lea digitálalaččat.
Maŋŋel go čoahkkin rahppui, de dárkkistedje geat leat áirrasin čoahkkimis, ja de gokče čoahkkima.
Guovdageainnu sátnejođiheaddji, Hans Isak Olsen, dieđihii ahte dál galget buot suohkanstivraáirasat mannat eará kanálii, go son háliida hupmat suohkanstivraáirasiiguin muhtun ášši birra.
Das ii namuhuvvon mihkkege makkár ákkaid geažil gokče čoahkkima,.
Suohkanlága paragráfa 11-5, nuppi ja goalmmát lađđasa vuođul, de galgá dahkkot mearrádus áirasiid gaskkas dan ektui. Dat ii dahkkon.
Rihkko suohkanlága
Vuođđomearrádus lea ahte álbmotválljejuvvon orgánat galget meannudit visot áššiid, ja mearridit maid visot áššiid rabas čoahkkimis, suohkanlága paragráfa 11-2 vuođul.
Jus giddejit čoahkkima, de fertejit dat álbmotválljejuvvon olbmot dahkat mearrádusa dan ektui, ja dat mearrádus galgá čujuhuvvot láhkavuđđui suohkanlága paragráfa 11-5, nuppi ja goalmmát lađđása bokte. Suohkanlágas čuožžu ahte dat mearrádus galgá dahkkotsuohkanstivraáirasiid jienasteami bokte , ja dat jienasteapmi galgá almmolašvuođas dahkkot.
Nu ii dahkkon dán áššis, eambbo sátnejođiheaddji mearridii ahte áirasat galget mannat eará kanálii gos galget sáhttet hupmat dan ášši birra giddejuvvon čoahkkimis.
Láhkavuođđu
Go čoahkkin lei gokčojuvvon, de čálii liikká Guovdageainnu suohkandirektevra, Kent Valio, čáttas, ná:
«Ášši galgá meannuduvvot giddejuvvon čoahkkimis suohkana ekonomiijahálddašeami várás, suohkanlága 11-5, goalmmát lađđasa b) bokte, almmolašlága paragráfa 23, vuosttaš lađđasa bokte.»
Mearrádus ii liikká dahkkon almmolašvuođas, eai ge áirasat jienastan dan áššis.
