Sámediggi lea juolludan 68 000 ruvnno 2022 Vårscenefest, dahje sámegillii Giđđalávdefestii.
Ruđat galget geavahuvvot čalmmustahttit sámi lávdedáidaga iešguđetlágan šáŋŋeriin ja cealkámušaiguin Giđđalávdefeasttas Romssas cuoŋománu 27.- 30.b. 2022.
«Giđđalávdefeasta» lea jahkásaš festivála Romssas mii álggahuvvui Rådstua Teaterlagain ja lávdedáiddafierpmádagain RedArt 2010:s. Fáddá dán jagáš festiválas lea čadnon eamiálbmogiidda ja nationála unnitloguid dillái, go lea sáhka sámi duohtavuođas. Gávpešiljus ceggejuvvo festiválalávvu mii galgá leat arena kulturdoaluide. Dát lea vuogas vuođđu buriid ságastallamiidda ja čoahkkimiidda.
– Lean ilus go sámi dáiddáriidda addo guovddáš sadji festiválas. Dat movttiidahttá eará nuorra dáiddáriid, ja lea movttiidahtti nuorra sámi lávdedáiddáriidda, dadjá sámediggeráđđi Maja Kristine Jåma (NSR).
