Guovdageaidnulaš gártá giddagassii maŋŋel go lea áitán sihke politiijaid ja earáid, son dubmehallá maiddái veahkaválddi geažil.
Guovdageaidnulaš gártá giddagassii maŋŋel go lea áitán sihke politiijaid ja earáid, son dubmehallá maiddái veahkaválddi geažil.
Badjelaš guovtti jagi áigi galge politiijat sáhtostit dievddu giddagassii Áltái. Dán mátki oktavuođas rigerii 45-jahkásaš ja čolgadii politiijabálvá njeaiga gii vikkai su doallat gitta politiijabiillas. Go ollejedje Áltái buollái fas riedja. Go politiijat galge bidjat dievddu giddagassii, de biehttalii almmái dán ja dan oktavuođas čievččahalai ja čorbmaduvvui nubbi politiijabálvá.
Goddináitagat
Ovddit geasi ges áittii 45-jahkásaš dievdu nuppi guovdageaidnulaš dievddu báhčit dahje goddit. Go politiijat válde albmá gitta, de áittii son politiijabálvá jápminduomuin ja logai iežas áigut čievččastit politiija. Beaivvi maŋŋel gohčodii seamma politiijabálvá «biro cihppanjamanin» ja ovdal go guđii leansmánnikantuvrra de čurvii sutnje «sieg heil» ja dagai nazi-dearvvuođaid. Guokte mánu maŋŋel dáid dáhpáhusaid čuggii almmái ruskkalihti niibbiin, seamma niibbiin áittii muhtin nissona čugget.
Biehttala
Áktor gáibidii dievddu 120 beaivái giddagassii, beali áiggis galggai čohkkát lohkaid duohken. Almmái mieđai belohahkii áššálažžan veahkaválddálašvuođas, biehttalii dikkis áitán olbmuid goddit, son čilgii maiddái ahte politiijat orrot su vuostá go dávjá váldet su gitta. Dievddu bealušteaddji oaivvildii ahte dievdu galgá beassat áššiin.
Šaddá čohkkát
Almmái lea ovdal dubmehallan veahkaválddi ja áitagiid geažil, maŋimus 2013 skábma. Sis-Finnmárkku diggegoddi dubme albmá 90 beaivái giddagassii, son gártá čohkkát 45 beaivvi, muhto dás gessojit 9 beaivvi eret háldogiddagasa geažil. Dasa lassin šaddá almmái máksit 3000 ruvnnu áššegoluid ovddas.
