Gergosat ovttasbargui

Čieža diimmu ovdal go jienasteapmi nohká, de leat bellodagat ain válggasteamen. Kárášjoga jienastanbáikki olggobealde leigga Sissel Gaup ja Svein Atle Somby čuožžumin ovttas ja juohkimin jienastanlihpuid.
 

Gealdagasas

Bargiidbellodaga sátnejođiheaddjievttohas Svein Atle Somby dovddasta iežas leat veahá gealdagasas otná eahkeda bohttosiidda.

 – Dáppe lea buorre miellaláhki ja olbmot leat movttegat. Lea váttis dadjat mo min bealis manná, dadjá Somby.

Go politihkka birra šaddá sáhka, de lea Sombys čielga oaivil mii lea sin stuorámus mihttu. Namalassii oažžut Bargiidbellodaga fas sátnejođiheaddji stullui.

 – Dat lea mis leamaš mihttu čađat ja lea fas áigi ahte mii beassat leat njunnošis, deattuha son.

Áigi lonuhit

Svein Atle Somby dadjá ahte sivva manin oaivvilda leat áigi sis fas beassat stivrejupmái, leat oktageardán ja dat ii leat ahte besset váldit badjelasat maŋŋel go Guovddášbellodat lea čorgen gieldda ruhtadili.

 – Dat mii lea áibbas sihkar, lea ahte boahtte jagi mis leat fas stuorra hástalusat ruhtadili bealis. Mis boahtá leat boahtte jagi fas vuolláibáza, oaivvilda Somby, gii lohká dál oaidnit man ollu dálá stivrejupmi lea bargan loktet ja buoridit ruhtadili.

Somby oaivvilda Guovddášbellodaga addit áibbas boasttu gova gieldda ruhtadilis, mii ii leat nu buorre go orro.

 – Dat lea nu mo mii leat čađat hállan, ahte doppe leamaš liigeruđat, maiguin dál lea eallán diimmá rájes. Duohtavuohta boahtá boahtte jagi, go mis ii leat šat seston ruhta ja beassat oaidnit rivttes loguid, čilge Somby.

Ovttasbargu

Somby dadjá maiddái jáhkkit iežas bellodaga sáhttit ovttasbargat buohkain.

 – Muhto mii fertet dieđus heivehallat min politihkka ja mo dat šaddá, čilge son.

Gergosat ovttasbargat

Kárášjot’lista sátnejođiheaddjievttohas Sissel Gaup lohká sin bellodaga bealis cealkán ahte leat gergosat ovttasbargat geainna beare, iige áiggo njulgestaga irgalit Bargiidbellodaga Svein Atle Sombyi.

 – Mii bargat ovttas buohkain, geat háliidit gávnnahit ahte mo mii galgat čatnat oktii iežamet áigumušaid. Mii sáhttit geainna beare ovttasbargat, beare mii oaidnit ahte mii heivet oktii loahpaloahppas, čilge Gaup.

Gaup muitala sin politihkka leat hui láhka Bargiidbellodagain, eaige leat nu stuorra erohusat.

 – Mii leat buohkaid várás listtus, eatge gula makkárge politihkalaš bellodahkii ja mii fátmmastat dien láhkai eanet olbmuid, geat eai loga ahte sii heivejit Bargiidbellodaga, dahje Olgeš bellodaga ideologiijai. Mii leat molssaeaktu diekko gasku, čilge Gaup.

Duhtavaš dán rádjai

Gaup lohká iežas hui duhtavažžan dán rádjai ja lohká olbmuid liikot, go muhttin politihkkárat beroštit leat oidnosis válgabeaivvi.

 – Olbmot liikojit go besset háleštit ovdal ja maŋŋel jienasteami politihkka birra, čilge Gaup.