Guhtta jagi leat dál dutkit ja mearrabivdit bargan ollašuhttit reahkáid bivdit merddiiguin.
Mihttu lea oažžut eksklusiiva reahkagálvvu.
Álttá bivdi, Espen Ottem, lea gearggus joatkit reahkabivddu, muhto lohká fiskeribladet.no:i ahte dalle ferte ordnejuvvot albma vuostáiváldin.
Son ohcala sihke vuostáiváldima gos vuššet reahkáid gárvvisin márkanii, ja maid vejolašvuođa doalvut eallireahkáid.
Nu go dál lea dilli, de ii leat dat oassi sajis.
Dan oktavuođas galgá čoahkkin leat Leavnnjas geassemánu 13. beaivvi, gosa lea dutkit ja bivdit bovdejuvvon ságastallat maid ja movt viidáseappot bargat prošeavttain.
