-Almmuhus-
KULTUVRAGelbbolašvuođalokten festiválas

Gelbbolašvuođalokten festiválas

-

-

Norgga Arktalaš universitehta lágida semináraid Riddu Riđus boahtte vahkkoloahpa. Festivála ođđa váldoovttasbargoguoibmi dáhtu loktet festiválagussiid gelbbolašvuođa.

Go Norgga Arktalaš universitehta ja Riddu Riđđu festivála vuolláičáliiga ovttasbargošiehtadusa sohppojuvvui maiddái ahte rektor Anne Husebekk rahpá dán jagi festivála mii lágiduvvo Olmmáivákkis, Gáivuonas boahtte vahkkus.

Seminára evakuerema birra: 

Davvi Álbmogiid guovddáža girjerádjosis, bearjadaga 10.07.15, dii. 12:00

Sámiid dutkamiid guovddáš lea ovddasvástideaddji. 

Dearvvašvuođa- ja fuolahussuorggi instituhta professor Ingunn Elstad logaldallá sápmelaččaid 1944 čavčča historjjá birra. 

Dearvvašvuođa- ja fuolahussuorggi instituhta vuosttašamanueansa Åshild Fause ges muitala man láhkai evakueren čuozai olbmuide. 

Dasa lassin muitala olmmáivággilaš Harry Solhaug iežas historjjá ja vásáhusaid evakueremis.

 – Riddu Riđđu lea guovddášfestivála Norggas ja miehtá máilmmi álgoálbmogiid deaivvadanbáiki. Festivála gaskkusta gelbbolašvuođa álgoálbmogiid birra ja čalmmustahttá kultuvrra sihke álgoálbmogiidda ja earáide, Lean rámis go ovttasbargat festiválain, lohká Husebekk UiT neahttasiidduide.

 

 

Dáhtu maiddái máhtu loktet

Maiddái universitehtii lea dehálaš olbmuid máhtu loktet, ja dát galgá bures čalmmustuvvot ovttasbarggus. Norgga Arktalaš universitehta lágida oainnat guokte seminára Olmmáivákkis bearjadaga.

 – Riddu Riđđu lea min gáldu dutkamii, oahpahussii ja gaskkusteapmái, čilge Husebekk.

 


Norgga Arktalaš universitehta rektor Anne Husebekk (gurutbealde) ja Riddu Riđu jođiheaddji Karoline Trollvik. Govva lea váldon go vuolláičáliiga ovttasbargošiehtadusa guovvamánus. Govven: Kila Anti 

SEMINÁRA GUOLLEERIID BIRRA: 

Davvi Álbmogiid guovddáža girjerádjosis, bearjadaga 10.07.15, dii. 15:00

Fáddán lea Norgga guolástuspolitihkka. Gii galggašii eaiggáduššat guolleeriid? 

Muhtin stáhta lávdegoddi lea árvalan ahte industriija galggašii beassat eaiggáduššat fatnasiid ja eriid. Leago dát áittan vai vejolašvuohtan mearrasámi guovlluide jerret panelas. 

Oasseváldit: sámediggeráđđi Silje Karine Muotka, Nofima Edgar Henriksen, Njuoskaguollesearvvi Svein Ove Haugland, Bivdi ovdaolmmoš Torulf Olsen, Riddostuimmiid Geir A. Iversen ja Norfra Steinar Eliassen.

Davvi-Norgga ja Sámi gullevašvuohta

Riddu Riđu ođđa váldo ovttasbargoguoibmi háliida maiddái ahte festivála áigumuš šaddat máilmmi stuorámus ja deháleamos álgoálbmogiidlávdin šaddá duohtan. Seammás lea sihke festiválas ja universitehtas seamma gullevašvuohta Davvi-Norgii ja Sápmái, dán čalmmustahttet seminárain.

 – Vuosttaš seminára lea Davvi-Norgga ja Finnmárkku evakuerema birra, nuppis ges lea sáhka Norgga guolástuspolitihka birra ja gii dat galggašii oamastit guolleeriid, dieđiha UiT.

 

Universitehtagoahti

Norgga Arktalaš universitehtas cegge maiddái dán jagi lávu Riddu Riđu festiválas.

 – Sámi dutkamiid guovddáš gaskkusta máhtu festivála áiggi ja juohká dieđuid universitehta ja min fálaldagaid birra. Lávvu lea rabas duorastagas lávvardahkii, čállá universitehta.

 


Vaikke Norgga Arktalaš universitehta easka dán jagi šattai festivála váldoovttasbargoguoibmin, de leamaš Riddu Riđus eará jagiid ge seminárat ja logaldallamat maid universitehta lea lágidan. Vuorkágovva: Kila Anti

 

-Almmuhus-