Ikte leigga gonagas ja dronnet galledeame Gilivuona. Ellinor Guttorm Utsi beasai dearvvahit gonagasa ja dronnega, ja son lei šaddan bures ráhkkanit ovdal gonagaslaš guossit bohtet.
Ikte leigga gonagas ja dronnet galledeame Gilivuona. Ellinor Guttorm Utsi beasai dearvvahit gonagasa ja dronnega, ja son lei šaddan bures ráhkkanit ovdal gonagaslaš guossit bohtet.
Ellinor Guttorm Utsi lei okta sis geat ledje čoahkkanan Gilivutnii váldit dronnega ja gonagasa vuostá go bođiiga galledit Davvesiidda suohkana gaskavahkku. Ovdal go gonagas ja dronnet bođiiga, de lei Utsi bures ráhkkanan ja jurddahan movt heive dearvvahit gonagasa ja dronnega.
– Mun fertejin iskat ovdagihtii movt heive dearvvahit ja váldit vuostá ná alla olbmuid. Mun de háleštin ja šiehtadin gonagasa persovnnalaš mielbargiiguin movt orru riekta dearvvahit ja movt galgá dearvvahit sudno. Gonagasa mielbargit lohke ahte orru riekta ahte mii sápmelaččat dearvvahit sámegillii, ja lohkat «Buore beaivvi». Dievddut, geain lei čiehkagahpir oaivvis, válde dan eret go dearvvahedje sudno. Dat gal manai hui bures, muitala Utsi.
Loga maid: Oaččui gonagasas rámi
Stáidnárnáhkkeveasku
Utsi čájeha ráhkisvuođa iežas kultuvrii ja álbmogii dujiin, ja de leige diehttelas ahte son skeŋke sámi duoji gonagasbárrii.
– Mun ledjen gorron veaskku stáidnárnáhkis gonagasbárrii maid geigejin sudnuide. Mun válljejin stáidnárnáhkis goarrut veaskku go dat čalmmustahttá dán guovllu ássiid kultuvra. Sisti dat lea birgehan dan guovllu olbmuid ovdalašáiggis ja dat heive vuohkkasit, go dat govvida dán guovllu resurssaid, čilge Utsi.
Govven: Priváhtagovva
Stuora ovdagovvan
Ellinor Guttorm Utsi lea Čorgašnjárggas turistafitnodaga «Davvi Siida» beaivválaš jođiheaddji, ja son lei ožžon rámi dronnegis go čalmmustahttá sámevuođa dakkár giliin gos sámevuohta ii leat nu guovddážis.
– Lei hui somá go dronnet logai munnje ahte moai isidiin letne stuora ovdagovvan, go moai čalmmustahtte sámevuođa, lohká Utsi.
Gonagas leaikkastalai
Gilevuonas lei arvedálki ja galbma biegga go gonagaslaš guossit bohte, ja gonagas leaikkastalai ja jearai ássiin «Ehpet go dii leat diŋgon buoret dálkki?»
– Gonagas ja dronnet oruiga mu mielas hui olmmošeaddját. Soai leaikkasteigga ja boagusteigga, nu go mii dábálaš olbmot ge, čilge Utsi.
Vaikko lei galbma dálki, de dat ii bissehan olbmuid vuolgimis dearvvahit gonagasbára. Ledje ollu olbmot boahtán, ja sis ledje maid sihke Norgga ja Sámi leavggat fárus.
Maŋemus galledanbeaivi
Disdaga leigga gonagas ja dronnet galledeame Ávanuori ja Falesnuori. Ikte manai mátki Gilevutnii, Davvesiidda suohkanii ja Donjevutnii ja Gáŋgaviikii.
Odne lea maŋemus beaivi sudnos Finnmárkkus dán hávvái, ja de galledeaba soai vel Vuonnabađa, Unjárgga suohkanis.
