-Almmuhus-
OĐĐASATGeigii gásttaskeaŋkka gádjunbeatnagiidda

Geigii gásttaskeaŋkka gádjunbeatnagiidda

-

-

Politiijameašttir Ellen Katrine Hætta attii 30 000 ruvnno skeaŋkan Norgga Gádjunbeatnagiidda Nuorta-Finnmárkkus.

– Lea somá beassat addit skeaŋkka veahkis nuppi veahkkái.

– Mun háliidan oidnosii loktet dan barggu maid gádjunbeatnagat dahket gearggusvuođabarggus min fylkkas. Sii barget dehálaš barggu vaikko eai leat álo nu oidnosis. Sii geat leat vásihan gádjojuvvot dahje gávdnot ohcanakšuvnnain dihtet man dehálaččat beatnagat ja eaiggádat leat gearggusvuhtii. Ollu giitu veahki ovddas, dajai Hætta go geigii Riddodoaimmahaga ja Hvide Sande gásttaskeaŋkka gádjunbeatnagii Limai.

 

Válljii geasa skeaŋka galgá

Skeaŋka lea gásttaskeaŋka, giitun go politiijameašttir Hætta gásttašii oljosuodjefatnasa OV «Bøkfjord» mannan duorastaga Ålesunddas. Hætta beasai válljet geasa geige skeaŋkka.

– Vástidin ovttatmano: Norgga gádjunbeatnagat! Leat ollugat geat barget dehálaš barggu Finnmárkkus, ja Norgga gádjunbeatnagat lea okta dain eaktodáhtolaš servviin mat barget dehálaš barggu min fylkkas, gos sáhttet leat heajos dálkkit, guhkes gaskkat ja rievdadeaddji dálki. Mis lea fylka gos luondduvásáhusat leat dehálaččat olbmuide. Jus bártidit, de dárbbašit buriid vehkiid vai gávdnat sin geaid ohcat, muitala politiijameašttir Ellen Katrine Hætta.

 

Giitevaččat

Skeaŋka lea guovtti oasis. Riddodoaimmahat lea addán 15 000 ruvnno ja Hvide Sande 15 000 ruvnno. Skeaŋkka mielde čuovui diploma ja dákti, ja geigejuvvui Girkonjárgga politiijaviesus ikte, mánnodaga.

– Mii leat hui giitevaččat dán skeaŋkka ovddas. 30 000 ruvnno lea ollu ruhta midjiide. Lea hui divrras oahpahit dákkár beatnagiid, nu ahte dát ruhta lei hui vuogas. Mii dovdat ahte skeaŋka lea dohkkeheapmi min barggu ovddas, dajai Norgga gádjunbeatnagiid Nuorta-Finnmárkku jođiheaddji Hilde Stenbakk.

 

Oktasaš ipmárdus

Riddodoaimmahaga OV «Bøkfjord» lea hybridafanas mii galgá doaibmat Romssas ja Finnmárkkus. Riddodoaimmahaga riddodirektevra Kirsti Slotvik lea hui duhtavaš go Norgga gádjunbeatnagat ožžo gásttaskeaŋkka.

– Mis lea oktasaš ipmárdus dálkái, biggii ja lundui. Lea hui suohtas go mii beassat leat mielde gádjumis olbmuid gáttis maid, dadjá Slotvik.

-Almmuhus-