-Almmuhus-
OĐĐASATGeige «Sámás Muinna» giellakampánjja Ruoŧa Sámediggái

Geige «Sámás Muinna» giellakampánjja Ruoŧa Sámediggái

-

-

Sámediggi lágidii moadde jagi dassái giellakampánjja «Sámás Muinna» mas čalmmustahtte sámegiela geavaheami erenoamážit nuoraid gaskka. Kampánja lihkostuvai bures ja dál geige Norgga Sámediggi dán kampánjja viidásat Ruoŧa Sámediggái.

– Mii leat hui duđavaččat «Sámás muinna» kampánjja sisdoaluin ja lihkostuvvamiin. Danin illudat go Ruoŧa Sámediggi háliida dán kampánjja fievrridit viidásat, dadjá Norgga Sámedikki presideanta Aili Keskitalo preassadieđáhusas.

 

Ruoŧa Sámediggi illuda

Norgga Sámediggi álggahii giellakampánjja «Sámás Muinna» 2013:s. Kampánja mihttu lei čalmmustahttit giellageavaheami nuoraid gaskka ja kampánja manai olu sosiála mediaid bokte. Kampánjja olis ledje Sámedikkis 24 giellaambassadevrra geat áŋgirušše kampánjjain ja ledje ovdagovat eará nuoraide.

– Mii illudit kampánjii ja sávvat ahte dát lea ávkin sámegillii Ruoŧas, dadjá Ruoŧa Sámedikki stivraságadoalli Håkan Jonsson.


Ruoŧa Sámedikki stivraságadoalli Håkan Jonsson illuda. Vuorkágovva. Govven: Astrid Helander.

 

Dehálaš bargu

Okta giellaambassadevrrain, Ina Theres Sparrok, lea maid mielde geigemis kampánjja Ruoŧa beallái Sámi. Son sávvá lihku nuoraide kampánjjain Ruoŧa beale rájá ja muitala ahte lei somás bargu leat giellaambassadevran.

Áŋgiruššama ulbmil lea váikkuhit dasa ahte:

• sámegiela geavaheapmi lassána

• eanebut sámástišgohtet

• sámegiella geavahuvvo eambbo arenain ja oktavuođain

• sámegiella čalmmustahttojuvvo

• servodagas lassána ipmárdus dasa man deaŧalaš midjiide lea beassat iežamet giela geavahit

Gáldu: Sámediggi / Sámás Muinna

– Leat giellaambassadevran lei somá ja miellagiddevaš. Dovden duođai ahte dahken dehálaš barggu go máttasámegiella lea áitojuvvon giella ja unnánat hállet dan, nu ahte sosiála mediaid bokte lean geahččalan čájehit máttasámegiela govaiguin, lohká ovddeš giellaambassadevra.

 

Lea maŋŋebárgga miessemánu 31.beaivve go Norgga sámediggepresideanta Aili Keskitalo geige «Sámás muinna» kampánjja Ruoŧa Sámediggái. Dát dáhpáhuvvá Staares gos Ruoŧa Sámedikkis lea dievasčoahkkin dien vahkku.

 

-Almmuhus-