-Almmuhus-
OĐĐASATGeavai eret Norgga delegašuvnna čoahkkimis

Geavai eret Norgga delegašuvnna čoahkkimis

-

-

Go Norgga Sámediggi geavai olggobeallai, de ii beassan buktit iežas oaivila ovdan ovdal go Norga evttohii šiehtadusas álgoálbmotvuoigatvuođaid sirdit álgosátnái.

Ikte lea Norgga delegašuvdna COP21 dálkkádatnjunuščoahkkimis evttohan sihkkut olmmoš- ja álgoálbmotvuoigatvuođaid teavstta paragráfa, ja sirdit dan šiehtadusas álgosátnái.

 

Vahát juo geavvan

Norgga Sámediggi lea oassin Norgga delegašuvnnas dálkkádatkonferánssas, muhto Sámedikki ovddasteaddji Jon Petter Gintal steaŋgahuvvui olggobeallái delegašuvnna álgočoahkkima. Dat dagahii ahte Sámediggi ii beassan buktIt iežas oaivila ovdan ovdal go Norgga evttohii šiehtadusas álgoálbmotvuoigatvuođaid sirdit álgosátnái.

 – Mii eat leat ovttaoaivilis dasa, ja de leimmet beassat dieđihit dan Norgii. Eat lean dieđus nagodit rievdadit Norgga oainnu, muhto leimmet soaitit nagodit hehttet ahte Norga vuosttaš šiehtadallančoahkkimis ovddida evttohusa. Eará strategiija lea ahte livčče sáhttán vuordit dassái go mat baicce earát livčče váldán ášši ovdan ja de buktán easka iežas oaivila. Nu movt dál šattai, de lea juo vahát geavvan, lohká Gintal.

 

Eai cakka jus vuosteháhku

Gintal lohká dál hupman Norgga váldošiehtadalliin Aslak Brunain, ja čilgehus sus manne Sámediggi geavai olgobeallái lei ahte lea ođđa šiehtadalli, iige lean nu siste movt doaibmá.

  – Brun lea deattuhan midjiide ahte eai áiggo caggat jus eará stáhtat mannet vuostá Norgga sirdinevttohusa, muhto go juo Norga lea evttohan dan ovttatmanos, de lea váttis diehtit maid eará stáhtat oaivvildit ja maid oažžot earáid mannat vuostá dan, lohká son.

 


Paragráfa man Norga lea evttohan sihkkut ja sirdit. Priváhta govva.

Máhtu gal áigot ávkkástallat

Sámiráđi presideanta Aile Javo muitala leat ollu čoahkkimat ja Sámiráđđi beassá dušše muhtun čoahkkimiidda oassálastit, ja eanas leat feaskáriin. Son lohká go Sámedikki eai suovvan čoahkkimis, de sáhttá das oktavuohta go leat vuosttaldan Norgga evttohusa.

 – Čilgehusaid maid leat gullan orrot Norga viggame beassat eret. Sii lohket ahte leat ođđa teavstta lasihan 4. paragráfii, mas áigot ávkkástallat álgoálbmogiid árbevirolaš máhtu. Rivttiid gal eai áiggo doarjut, muhto álgoálbmogiid máhtu gal áigot go stáhtaide heive, lohká son.

 

Sii leatge dál eará organisašuvnnaiguin časkkan oktasaš strategiija váikkuhit eará stáhtaid ahte eai galgga Norgga doarjut. Javo mielas lea hui váidalahtti go lea vel justte Norggain geainna dál leat dego geavvan salláfággái.

 

Ávvir ii leat lihkostuvvan oažžut ságaide Norgga delegašuvnna váldošiehtadalli Aslak Brun, muhto son lohká VG aviisii:

– Lea go ulbmil dálkkádatšiehtadusas váldit vuhtii álgoálbmogiid, ja lea go dat dehálaš vuhtii váldit. Lea go biebmosihkarvuohta ulbmil, dahje lea go dat dehálaš váldit vuhtii. Mii leat evttohan ahte dát galget operatiiva oassái, muhto ii oassin oanehis ulbmiliin, lohká Brun.

 


Sámiráđi presideanta Aile Javo ballá šiehtadusas ii boađe mihkkege álgoálbmogiid birra. Vuorkágovva: Anne Rasmus

Dálkkádaga namas

Aile Javo muitala manne lea dehálaš ahte álgoálbmotvuoigatvuođat leat oassin dálkkádatšiehtadusas.

– Hui dávjá lea nu ahte stáhtat dálkkádaga namas rihkkot álgoálbmotvuoigatvuođaid, nu movt ovdamearkka dihte go huksejit bieggamilluid ja go buđđot eanuid ja jávkadit álgoálbmogiid. Lea hui dehálaš ahte šiehtadusas leat mielde álgoálbmotvuoigatvuođat, muhto orru juste dál hui čáhppat buot go ii oro mihkkege álgoálbmogiid birra dálkkádatšiehtadussii šaddama, lohká  Sámiráđi presideanta Aile Javo.

 

Lávvordahkii galgá šiehtadusevttohus gárvvis ovdal go stáhtaid ministarat galget boahtte vahkkus geahčadit politihkalaš beliid šiehtadusas.

 

-Almmuhus-