Norgalaččaid gaskamearálaš interneahttageavaheapmi lassána buot ahkeluohkáin. Guorahallan čájeha ahte geavahit interneahta birrasii njeallje diimmu beaivái.
Masá buohkat 13-44 ahkelogus geavahit interneahta beaivválaččat, ja birrasii bealli vuorrasiin badjel 80 jagi geavahit interneahta beaivválaččat, čájehit Norgga mediabaromehter logut.
Guorahallan čájeha ahte 96 proseantta álbmogis lea mátketelefovdna, ja dat geavahuvvo gaskamearálaččat 2 ½ diimmu beaivái.
Dan botta go mátketelefovdna- ja interneahttageavaheapmi lea sakka lassánan maŋimuš 30 jagis, de leat oallugat heaitán lohkamis báberaviissaid.
Ođđasat sosiála mediain
Eanet nissonolbmot ja dievdoolbmot lohket ođđasiid sosiála mediaid bokte. Nuorat ja nuorra ollesolbmot lohket dávjá ođđasiid Instagram ja Snapchat bokte. Badjel 25-jahkásaččat ges gávdnet ođđasiid Facebooka bokte.
10 proseantta álbmogis muitalit ahte čuvvot ođasgova dušše sosiála mediain.
Nuorat ja nuorra ollesolbmot muitalit ahte guoimmuheami lassin, de geavahit Tiktoka maiddái ođasgáldun. 40 proseantta nuorain gávdnet ođđasiid Tiktokas.
Dábálaš mediageavaheapmi unnu
Dan botta go nuorra ollesolbmot čuvvot ođđasiid neahttaaviissain ja sosiála mediain, de geavahit vuorrasat ain dábálaš mediaid, nu go aviissaid, rádio ja TV.
1991-2008 áigodagas ledje báberaviissaid, TV ja rádio bivnnuheamos mediat. Badjel 80 proseantta lohke báberaviissaid ja gehčče TV beaivválaččat dan áigge.
TV-geahččit leat sakka unnon dan rájes. 58 proseantta gehčče dábálaš TV-kanálaid 2017:s, dát lohku njiejai 35 prosentii 2021:s. TV-geahččit lassánedje fas diibmá, dalle muitalii 47 proseantta álbmogis ahte gehččet TV.
Go obbalaččat geahčada loguid, de čájehuvvo ahte badjel 90 proseantta norgalaččain čuvvot ođđasiid beaivválaččat. (©NTB)
