Dán jagi leat registreren 50 geatkečivgama Norggas. Dat leat 11 čivgama eambbo go Stuoradiggi lea mearridan.
Dán jagi leat registreren 50 geatkečivgama Norggas. Dat leat 11 čivgama eambbo go Stuoradiggi lea mearridan.
Geasset loahpahuvvui dán jagáš geatkečivganregistreren.
Rovdata lea dál geahččan dieđuid mat leat čoggojuvvon, čállá Rovdata preassadieđáhusas.
– Čájehuvvui ahte leat 15 unnit geatkečivgama go diibmá. Diibmá ledje 65, dál leat 50. Muhto leat ain eambbo geatkkit go mihttu lea, lohká Rovdata jođiheaddji Jonas Kindberg.
Sulli seamma olu geatkkit go ovdal
Geatki guoddá guovvamánus, ja giđđat registreregohtet biejuid gos leat čivggat.
Daid loguid vuođul rehkenasto geatkenáli obbalaš lohku, ja das adno gaskamearálaš lohku.
– Dál leat 50 čivgama, diibmá ledje 65 ja ovddit jagi 52, de leat sullii 350 rávis geatkki olles Norggas. Dat lea sullii seamma go 2014:s ja 2015:s, lohká Kindberg.
Čieža čivgama váldon eret
Dán jagi logut čájehit ahte buot guovlluin leat eambbo geatkkit go galggaše. Gaskamearálaš lohku čájeha dan seamma.
Gaskamearálaš lohku adno danne go njiŋŋelasat eai oaččo seamma mađe čivggaid juohke jagi.
Birasdirektoráhta gohččuma vuođul leat čieža dain 50 čivgamis váldon eret.
Unnon
Geatkenálli lea unnon miehtá riikka, jus buohtastahttá diimmážiin.
– Eanemus lea unnon Hedemárkkus, gos lea njiedjan viđain čivgamiin. Opplánddas, Nordlánddas, ja Romssas ja Finnmárkkus leat juohke guovllus dál golbma unnit čivgama. Trøndelágas, ja Møre ja Romsdalas lea okta unnit čivgan, lohká Kindberg.
