Skábmagovat festivála lágida mánáide ja nuoraide doaimmaid ja geasuha sámi násttiiguin.
Skábmagovat festivála lágida mánáide ja nuoraide doaimmaid ja geasuha sámi násttiiguin.
Suoma beale mánáid-tv Unna Junná doallá mánáidbeaivvis bargobáji ja olles filbmačájálmasa. Unna Junná -filbmačájálmasas lea maiddái live-musihkka, go Unna Junná ovddeš láidesteaddji Anna Näkkäläjärvi-Länsman boahtá lávlut Unna Junná várás dahkkon musihka.
Mánáidbeaivvis oaidnit maiddái Ima Hutkosat -musihkkavideoid. Daid lassin oaidnit filmmaid ja videoid maid mánát leat ieža filbmabargobájis ráhkadan, sihke Norgga ja Ruoŧa beal mánáid-tv buktagiid.
Bargobájit mánáide
Bargobájiin oahpásnuvvat filbmatraileriid ráhkadeapmái ja filmmaid jietnamáilbmái. Niki Rasmus láidesta filmmaid jietna- ja musihkkabargobáji ja Martta Alajärvi trailerbargobáji.
Mánáide lea maiddái huksejuvvon Sajosa šilljui unna muohtateáhter. Skábmagovaid mánáidbeaivi lea duorastaga 21.1.2016 Sajosis.
Prográmmas leat filmmat ja bargobájit jalivemusihkka vuolledásse- ja mánáidgárdeahkásaš mánáide. Beaivvi prográmma álgá diibmu 9.00 ja bargobájit diibmu 10.00.
Inger-Mari Aikio ja Amoc nuoraidbeaivvis
Nuoraidbeaivi lea duorastaga 21.1.2016 Siida Sámi museas dbm 10:00. Nuoraidbeaivi lea oaivvilduvvon badjedásse- ja logahatahkásaš nuoraide ja prográmmas leat sidjiide heivvolaš filmmat. Prográmmas filmmaid lassin bargobádji ja livemusihkka.
Filmmat ja bájit
Nuoraidbeaivvis čájehuvvo Inger-Mari Aikio ođđaseamos filbma «AMOC – Vuosmuš», mii muitala anárašráppára Amoc birra. Dan lassin Amoc nappo Mikkal Morottaja lea báikkis ráppeme.
Eará filmmat nuoraidbeaivvis leat Ville-Riiko Fofonoff bagadallan Hangover Sápmi ja Elle Márjá Eira bagadallan «Iđitsilba», mii lea oassin «7 Sámi stories» -filbmaráiddus.
Bargobádji gieđahallá still-govaid govveme dahjege čuovgagovvema. Bargobáji boahtá doallat govvejeaddji Tarmo Lehtosalo.