Finnmárkku fylkkagielda lea ožžon miljovdnabeale Davvi-Norgga Seastinbáŋkku vuođđudusas geasseskuvllaid lágidemiide Finnmárkkus. Dalle ožžot fidnofágaoahppit ja fidnooahppit ođđa vejolašvuođa ceavzit dehálaš fágain.
Geasseskuvllain ožžot joatkkaoahppu 1 fidnofága oahppit ođđa vejolašvuođa ceavzit matematihka dahje luonddufágaeksámena.
Fálaldat addo maiddái ohppiide geat eai leat ceavzán daid fágain, dieđiha Finnmárkku fylkkagielda preassadieđáhusas.
Ođđa vejolašvuohta ohppiide
Lea njealját jahki go fylkkagielda lea ožžon ruhtadeami skeaŋkkas lágidit geasseskuvllaid. Gelbbolašvuođa váldolávdegotti jođiheaddji Johnny Ingebrigtsen lea ilus go dán jagi maid lágiduvvo geasseskuvla.
– Vuođđudus lea máŋga jagi dorjon Finnmárkku nuoraid ja fylkkagieldda. Ruhtadeapmi lea dagahan ahte ollu nuorat ožžot vejolašvuođa njulget dili iežaset oahpus, go besset geasseskuvlii searvat ja ožžot vejolašvuođa ceavzit dehálaš fágain, muitala Ingebrigtsen.
Váikkuha eanet čađaheapmái
Ovddit geasseskuvllat leat leamašan sukseassan. Oktiibuot leat birrasii 150 oahppi ceavzán ovtta dahje goappašat fágain geasseskuvllas. Eanaš ohppiin geat cevzet geasseskuvlla birgejit bures viidáseappot oahpahusmannolagas.
Viđa skuvllas
Geasseskuvllat lágiduvvojit Hámmárfeasttas, Álttás, Girkonjárggas, Čáhcesullos ja Deanus. Skuvllat mearridit ieža álggaheami.
Oahppit geat áigot geasseskuvlii searvat, fertejit ieža váldit oktavuođa dainna skuvllain gosa áigot.
Jus eará joatkkaskuvllain lea alla beroštupmi geasseskuvllaide, de sáhttet doppe maid čađahit dan.
Almmolaš geigejupmi
Almmolaš geigejupmi lágiduvvo Scandic Hoteallas Hámmarfeasttas geassemánu 7. beaivve.
Báŋkohoavda Jens-Bernhard Thomassen geige skeaŋkka Finnmárkku fylkkagieldda gelbbolašvuođa váldolávdegotti jođiheaddjái Johnny Ingebrigtsen.
