Geassemánu rájes šaddá álkit norgalaččaide, geat eaiggáduššet barttaid Ruoŧas, oastit elrávdnje-, telefovdna- ja interneahttabálvalusaid Ruoŧa fitnodagain.
Dássážii lea leamaš váttis dahkat šiehtadusaid iešguđetlágan bálvalusaiguin Ruoŧas jus oastis ii leat Ruoŧa persovdnanummar. Earret eará lea dat čuohcan 22 500 olgoriikka bartaeaiggádii geain leat barttat Ruoŧas.
Dássážii ii leat leamaš vejolaš oažžut makkárge identitehtanummara Ruoŧas man galgá geavahit dakkár bálvalusaid oktavuođas, muhto geassemánu 18. beaivvi rájes rievdá dat.
Ruoŧa Riikkabeaivi lea mearridan ahte buot olgoriikkalaččat, geat eaiggáduššet barttaid Ruoŧas, galget sáhttit ohcat identitehtanummara, čállá Nordisk samarbeid preassadieđáhusas.
Dat rievdadus dahká ahte bartaeaiggádat sáhttet earret eará diŋgot elrávdnje-, telefovdna- ja interneahttabálvalusaid Ruoŧas.
– Lea hui somá go dakkár mearrádus viimmat lea dahkkon. Grensehinderrådet lea aktiivvalaččat bargan dan nammii ahte Ruoŧŧa galgá addit eambbo vejolašvuođaid olgoriikka bartaeaiggádiidda, go dálá vuogádat lea leamaš váttisvuohtan oallugiidda, lohká Grensehinderrådet jođiheaddji Kimmo Sasi.
