Kåre Olli lea mearridan joatkit politihkas ja lea gearggus Bargiidbellodaga presideantaevttohassan, jus jerro.
Ávjovári válgabiirenjunuš Kåre Olli, guhte maid lei Helga Pedersena hástaleaddji Bb presideantaevttohassan, muitala iežas maid árvvoštallan geassádit.
Helga Pedersen geassádii mannan bearjadaga ja Sámedikki Bargiidbellodagas (Bb) ii leat dál presideantaevttohas.
– Jáhkketmeahttun mii dáhpáhuvai
Kåre Olli muitala ožžon máŋga buori rávvaga, muhto dattetge son mearridii joatkit politihkas. Loahpalaččat lei dattetge politihkka mii lei dehálabbo go dat dáhpáhus mii dáhpáhuvai Sámedikkis mannan vahkus, go Bb čájehii fámu ja gomihii Norgga Sámiid Riikkasearvvi ráđi.
– Lei jáhkkemeahttun dat mii dáhpáhuvai, go fámostalle dainna vugiin. In doarjjo dákkár vuogi, ja lea imaš go dan dahke, lohká Kåre Olli ja lasiha jođánit ahte soitet leat sivat maid son ii dieđe.
Son ii loga iežas gulaskuddan sámediggepresideanttain Vibeke Larseniin dahje earáiguin bellodagas.
Dál maid gearggus
Kåre Olli, guhte lea mearridan joatkit politihkas, lohká iežas gearggusin presideantaevttohassan vuolgit, jus jearaldat boahtá bellodagas.
– Ledjen Helga hástaleaddji, ledjen dalle gearggus ja lean maid dál gearggus, lohká son.
Politihkka deháleamos
Su mielas šattašii boastut geassádit bellodagas, dainna ákkain ahte ii doarjjo dáhpáhusa.
Ávvir jearrá doarju go son iežas bellodaga ja ráđi, muhto dasa ii vástit Olli čielgasit ja deattuha ahte ii doarjjo dan vuogi mo lea dahkkon.
– Bb politihkka lea mii dál lea dehálaš ja oažžut dan fievrriduvvot Sámedikkis. Lean gearggus válgagižžui, mii fertet dál baicce čohkket návccaid ja geahččat ovddasguvlui, lohká Kåre Olli.
Eaba loga vuođu
Helga Pedersen ii lohkan vuođu Bb:s ovddidit eahpeluohttámuša ja dasa lea Olli ovttaoaivilis.
– Lei ovttajienalaš bušeahtta, nu ii lean mu oainnu mielde ge vuođđu ovddidit eahpeluohttámuša. In doarjjo sin daguid, mu mielas ii lean dárbu dál fámostallat nu lahka válggaid, loahpaha Olli.
Smiehtada
Gáissá válgabiirenjunuš Bjørn Inge Mo ii loga iežas árvvoštallan geassádit bellodagas, vaikko ii leat ovttaoaivilis Sámedikki Bb-joavkku daguin.
Son oaivvilda ahte livččii galgan buoret gulahallan ja ahte lei boasttu mearrádus váldit badjelasas fámu ovdal válggaid.
– Mun in dieđe háliidan go presideantaevttohassan, muhto árvidedjen ahte Kåre Olli lea gearggus, čaimmiha Mo, guhte lohká mearridit jus gažaldat ovddiduvvo.
Son geassádii presideantaevttohassan čakčat ja lohká sivvan dasa lei dearvvašvuohta.
– Mus dieđusge eai leat makkárge ambišuvnnat dál ge vuolgit evttohassan, loahpaha son.
Ođđa presideantta ja várrepresideantta nominašuvdna
Duorastaga Ávviris boahtá ovdan ahte Bargiidbellodat čađaha dušše ođđa nominašuvnna nuortaválgabiirres, gos leat maŋemuš áigge geassádan olbmot, earret eará Helga Pedersen.
Ođđa presideantta ja várrepresideantta nominašuvdna galgá čađahuvvot.
Bargiidbellodat čohkke fas válgabiirriid sámekonferánsii ođđajagis, buori áiggis ovdal njukčamánu 31. beaivvi.
