Dálá sátnejođiheaddji Kárášjogas, Anne Toril Eriksen Balto, sávvá oažžut jienasteddjiid luohttámuša.
Dálá sátnejođiheaddji Kárášjogas, Anne Toril Eriksen Balto, sávvá oažžut jienasteddjiid luohttámuša.
Guovddášbellodaga sátnejođiheaddji evttohas ja dálá sátnejođiheaddji Anne Toril Eriksen Balto sávvá oažžut ođđa luohttámuša jienasteddjiin boahtte válgaáigodagas. Balto lea maŋemuš njeallje jagi jođihan Kárášjoga gieldda, ja lea gearggus joatkit.
– Háliidan bargat Kárášjoga servodagas ja ovddidit dan. Leat ollu ollašuhttán dán áigodagas, leat earret eará njulgen gieldda ekonomiija, lohká son.
Balto muitala njeallje jagi áigi lei Kárášjoga gielddas 22 miljovnna vuolláibáza, dál čájeha rehketdoallu ahte gielddas lea 14 miljovnna buorrin.
– Ja dainna lean hui duđavaš, go leat nagodan jorgalit oalát gieldda ekonomiija. Eat dárbbašan opmodatvearu ásahit, muhto leat baicce fállan nuvttá doaimmaid mánáide, lohká son.
Ollašuhttán válgalohpádusaidis
Balto lohká guovddášbellodaga nagodan ollašuhttit lohpádusaidis mannan válgagiččus, gos earret eará okta lohpádus lei eambbo rabasvuohta gielddas.
– Dál lea sadjosis buot áššebáhpárat gieldda neahttasiiddus, mii ovdal ii leamašan gávdnamis. Dál áigut ain vuoruhit ja ásahit eambbo sajiid boarrásiidda, skuvlla vuoruhit go oaidnit dárbbu čuovvut digitála ovdáneame. Dohko lea dárbu oastit eambbo dihtoriid ja ođasmahttit daid mat leat, lohká Balto.
Kárášjoga sátnejođiheaddji oaidná dárbbu ráhkkanit gieldda boahtteáigái, ja lasihastá ahte guovddášbellodat lea dán áigodagas vuoruhan álbmotdearvvašvuođa.
Dát ášši deaddiluvvui vuosttaš geardde báberáviissas cuoŋománu 11. beaivvi.
