Lars Georg Fordal álggii mannan vahkku Barentsčállingotti jođiheaddjin, ja lohká iežas gearggus bargat buot maid nákce Barentsguovllu ovddas.
Lars Georg Fordal álggii mannan vahkku Barentsčállingotti jođiheaddjin, ja lohká iežas gearggus bargat buot maid nákce Barentsguovllu ovddas.
Barentsčállingottijođiheaddjin galgá Lars Georg Fordal (39) leat njunnošis nannemin prošeaktaovttasbarggu Norgga ja Ruošša rájiid badjel.
– Eanemus gelddolaš ođđa virggis lea dál vuos čiekŋudit daidda oallut prošeavttaide main mii leat mielde, oahppat eambbo mo Barentsovttasbargu doaibmá ja geahččat mo sáhttá doaimmaid vel lasihit, lohká Fordal preassadieđáhusas.
Hálddašit 30 miljovnna ruvnno
– Fordal lea njeallje jagi bargan Generálakonsuláhtas Murmánskkas ja dovdá bures Barentsovttasbarggu ja Barentsguovllu. Goitge lea olu mii lea ođas ja olu maid ferte oahppat dál go galgá gozihit ahte 30 miljovnna ruvnno maid Olgoriikadepartemeanta lea juolludan prošeavttaide geavahuvvojit bures ja riekta, čállá Barentsčállingoddi preassadieđáhusas.
– Dehálaš doalahit ustitlaš ovttasbargu
Fordal ieš oaidná dehálažžan doarjut ja nannet guovlluovttasbarggu. Fordal oaidná ge Barentsovttasbarggu geaidnun mo ovttasbargat Ruoššain:
– Go earát hupmet áitagiid birra, de čujuhit mii daidda bohtosiidda maid lea olahan ustitlaš ovttasbargoprošeavttaid bokte ja mo dat leat vuoitun buohkaide.
Čalmmustahttit man dehálaš dákkár ovttasbargu lea
Barentsčálllingottis muitalit ahte gaskamutto skábmamánu boahtá EO ja EØS-ministtar Aspaker galledit Barentsčállingotti gullat eambbo Norgga-Ruošša ovttasbarggu birra. Čavčča mielde šaddet eambbo čoahkkimat politihkkariiguin ja ráđđehusláhttuiguin. Dain deaivvademiin áigu Fordal deattuhit man dehálaš Barentsovttasbargu duođai lea.
– Min bargu lea bargat dan guvlui ahte olbmuide šaddá lunddolažžan rasttildit ráji, deaivvadit ja ovttasbargat rájiid badjel. Ná šaddá eahpádus ja bahávuohta ustitvuohtan ja ráfálaš jurdagiidda, lohká Fordal.
Čavčča deháleamos bargu
Okta dán čavčča stuora dáhpáhusain lea Prošeaktajođiheaddjikonferánsa mii lágiduvvo golggotmánu Tromssas. Dohko čoahkkanit birrasii 160 ovddeš prošeaktajođiheaddji juogadit máhtu ja vásáhusaid. Doppe galgá Fordal ja su mielbargit deaivvadit daiguin deháleamos olbmuiguin go lea sáhka ásahit ealli ja doaimmalaš barentsovttasbarggu; namalassii prošeaktajođiheddjiiguin, čállá Barentsčállingoddi preassadieđáhusas.
– Dát leat olbmot geat váldet ovddasvástádusa ja ovdánahttet dađistaga ođđa vugiid mo ovttasbargat ja čatnat oktavuođaid. Sis lea maid nanu diehtu dan birra mo bargat prošeavttaiguin Ruoššas. Dan birra šaddá miellagiddevaš eambbo gullat, lohká Fordal.
